Qazaqstanda 35 myńnan astam adam týberkýlezdik esepte tur
ASTANA. QazAqparat - Respýblıka boıynsha qurt aýrýyna shaldyqqandardy emdeý men olarǵa áleýmettik kómek kórsetýge 47,7 mlrd teńge bólingen.
Al, Almaty qalasy boıynsha týberkýlezdi emdeýge bıýdjetten 4,2 mlrd teńge qarastyrylǵan. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly dırektory Tileýhan Ábildaev habarlady.
Resmı málimetterge súıensek, 2018 jyly ońtústik astanada atalǵan dıagnozben dıspanserlik esepte turǵandar sany 905 adam bolatyn. Onyń ishinde 648 adamǵa dıagnoz tuńǵysh ret qoıylǵan.
Fılıal basshysynyń aıtýynsha, ótken jyly týberkýlez qalada 8,2 paıyzǵa azaıǵan. Sonymen qatar, juqpaly dertten kóz jumǵandar sany da tómendedi. Atap aıtqanda, 2017 jyly týberkýlez 65 adamnyń ólimine sebepshi bolǵan bolsa, byltyr olardyń sany 49-ǵa deıin kemigen.
Jyl saıyn 24 naýryzda álemde Dúnıejúzilik týberkýlezge qarsy kúres kúni atalyp ótedi. Dúnıejúzilik densaýlyq saqtaý uıymynyń muryndyq bolýymen ótetin dástúrli shara bıyl «Týberkýlezdi joıý, syrqattardy TOLYQ EMDEP JAZÝ» atty uranmen uıymdastyrylmaq (Find. Treat. All. #EndTB»).
Qazaqstanda týberkýlez tegin emdeledi. Týberkýlezdiń aldyn alý, anyqtaý men emdeý kepildendirilgen tegin medıtsınalyq kómek sheńberinde júrgiziledi.
Statıstıkaǵa qaraǵanda, 2018 jyly Qazaqstanda 35 myń 181 patsıent dıspanserlik esepte turǵan bolatyn (onyń 14 myń 874-i týberkýlezdiń belsendi túrimen aýyratyndar). Onyń ishinde 8 myń 942 adamǵa dıagnoz alǵash ret qoıylǵan.
Der kezinde anyqtalyp, tıisti em-dom jasalsa týberkýlezdi tolyq emdep jazýǵa bolady. Sondyqtan aýrýdy asqyndyrmaı, emdeýshi dárigerdiń nusqaýlaryn oryndaýdyń mańyzy zor.
Dúnıejúzilik densaýlyq saqtaý uıymynyń málimetinshe, 2000 jáne 2016 jyldar aralyǵynda týberkýlezdi erte anyqtaý men emdeý nátıjesinde álem dárigerleri 53 mıllıonnan astam adamnyń ómirin saqtap qalǵan.
Týberkýlezdiń qarapaıym túrin emdeýge shamamen 6 aıǵa jýyq ýaqyt ketedi. Qazaqstanda bul aýrý ıntegratsııalanǵan baqylaý strategııasy boıynsha emdeledi. Baqylaýdyń bul túri týberkýlezdiń jabyq túrimen aýyratyn naýqastardyń emhanada ambýlatorlyq em qabyldaýyna múmkindik beredi.
Týberkýlezdiń aldyn alý úshin emhanada turaqty tekserýden ótip turý qajet. Tekserý men ekpe egý kepildendirilgen medıtsınalyq kómek sheńberinde tegin júrgiziledi.
