Qazaqstanda 348 oqý orny dýaldy oqytý júıesimen bilim alýda
ASTANA. QazAqparat - 22 myńnan astam stýdent dýaldy oqytý júıesimen bilim alýda. Bul týraly búgin Ortalyq kommýnıkatsııalar qyzmetindegi baspasóz máslıhatynda QR BǴM Kásiptik-tehnıkalyq jáne orta bilimnen keıingi jańǵyrtý departamenti basshysynyń orynbasary Ernat Júnisov málim etti.
«2014 jyldan bastap dýaldy oqytý jol kartasy Úkimet qaýlysymen bekitilip, júzege asyrylýda. Byltyrdan beri biz dýaldyq oqytý júıesin zańnamalyq túrde bekittik, Eńbek kodeksine dýaldy oqytý turǵysynda jeke bap engizdik. Sonymen birge keıingi bilim týraly zańnamaǵa engizilgen ózgeristerge baılanysty qazirgi kezde bizdiń oqý oryndarymyzdyń stýdentteri óziniń tájirıbesiniń 60 paıyzyn kásiporyndar bazasynda ótkizýge múmkindik aldy»,-dep toqtaldy ol.
E. Júnisovtiń sózine qaraǵanda, búginde Qazaqstanda 348 oqý orny dýaldy elementtermen jumys jasaýda. Osy rette 2 myńnan astam kásiporynmen kelisimder bekitildi.
«Negizgi baǵyttar retinde energetıka, munaı-gaz, qurylys, aýyl sharýashylyǵy jáne ózge de tehnıkalyq mamandyqtar boıynsha, ıaǵnı 86 mamandyq aıasynda 22 myńnan astam stýdent dýaldy oqytý júıesimen bilim alýda»,-dedi ol.
Onyń aıtýynsha, búginde atalǵan dýaldy oqytý júıesimen jumys istep júrgen stýdentterge kásiporyndardan jalaqy tólenýde.
