Qazaqstanda 3,4 mln adam tegin dári-dármek alady
ASTANA. KAZINFORM – Qazaqstanda keıingi 7 jylda tegin ambýlatorııalyq dári-dármek alatyndar sany 1,9 mln-nan 3,4 mln adamǵa deıin artty. Bul týraly QR Densaýlyq saqtaý vıtse-mınıstri Tımýr Muratov OKQ alańynda ótken baspasóz konferentsııasynda málimdedi.
Vıtse-mınıstrdiń aıtýynsha, búginde memleket esebinen beriletin dári-dármekpen eldegi árbir altynshy turǵyn qamtylyp otyr.
– Eger 2018 jyly tegin dári-dármekpen 1,9 mln adam qamtamasyz etilse, 2025 jylǵa qaraı bul kórsetkish 3,4 mln azamatqa jetti. Keıingi jyldary ambýlatorııalyq dári-dármekpen qamtamasyz etý júıesi aıtarlyqtaı keńeıdi, - dedi Tımýr Muratov.
Sonymen qatar osy baǵytqa bólinetin qarjy kólemi de birneshe ese ulǵaıǵan.
– 2018 jyly ambýlatorııalyq dári-dármekpen qamtamasyz etýge 87,2 mlrd teńge bólinse, 2026 jyly bul kórsetkishti 337 mlrd teńgege deıin jetkizý josparlanyp otyr. Buǵan ınflıatsııalyq úderistermen qatar, qymbat turatyn ınnovatsııalyq preparattardyń tizimge engizilýi de áser etti, - dedi vıtse-mınıstr.
Aıta keteıik, buǵan deıin elde 1 mıllıardqa jýyq dárilik zat qaptamasy tańbalanǵany habarlanǵan edi.
