Qazaqstanda 32 joǵary oqý orny qaıta qurylady
ASTANA. QazAqparat - Qazaqstanda 32 joǵary oqý orny kommertsııalyq jáne kommertsııalyq emes aktsıonerlik qoǵamdar bolyp qaıta qurylady. Bul týraly búgin Úkimet otyrysynda memlekettik menshik nysandaryn túgendeý máselesi boıynsha baıandama jasaǵan QR Qarjy mınıstri Baqyt Sultanov málim etti, dep habarlaıdy QazAqparat.
«Joǵarǵy oqý oryndardy jekeshelendirý boıynsha: Bilim jáne ǵylym mınıstrligimen birlesip jekeshelendirýdiń mynadaı nusqasy ázirlendi. 32 joǵarǵy oqý oryndary kommertsııalyq jáne kommertsııalyq emes aktsıonerlik qoǵamdar bolyp qaıta qurylatyn bolady. Bul jumys 2017 jyldan bastalady. 2020 jylǵa aktsııalardy qosymsha shyǵarý jolymen jeke kapıtaldy tartý júzege asyrylatyn bolady», - dedi Sultanov.
Onyń aıtýynsha, Bilim týraly zańnamaǵa tıisti ózgerister engizilgennen keıin 2018 jyly kolledjder úlken kásiporyndarǵa jáne ýnıversıtetterge senimgerlik basqarýǵa usynylady.
«6 medıtsınalyq joǵarǵy oqý orny boıynsha 2017 jyldan bastap strategııalyq áriptestiktermen birlesip, qamqorlyq baǵdarlamasy júzege asyrylady. 2018 jyldan bastap - ýnıversıtettik klınıkalardy birlesip basqarý boıynsha sharalar júzege asyrylatyn bolady. 2019 jyldan bastap - senimgerlik basqarýǵa berý júzege asyrylady», - dedi ol.
