Qazaqstanda 32 sheteldik ýnıversıtet jumys isteıdi
ASTANA. KAZINFORM – Elimizde 32 sheteldik ýnıversıtet túrli formatta jumys istep jatyr. Bul týraly elordada ótip jatqan Bilim berý sapasyn qamtamasyz etý jónindegi X Ortalyq Azııa halyqaralyq forýmynda Ǵylym jáne joǵary bilim vıtse-mınıstri Talǵat Eshenqulov aıtty.
Onyń aıtýynsha, 2025 jyly qyrkúıekte elimizde birqatar sheteldik JOO-lardyń fılıaldary ashyldy.
- Olardyń qatarynda Cardiff University, Coventry University, Woosong University, Dessaýdaǵy Anhalt joǵary oqý orny jáne Máskeý memlekettik halyqaralyq qatynastar ınstıtýtynyń (MGIMO) fılıaldary bar. Al De Montfort, Coventry, Cardiff jáne Woosong ýnıversıtetteriniń fılıaldary derbes jumys isteıtin joǵary oqý oryndary retinde quryldy, - dedi spıker.
Sonymen qosa, ol qazaqstandyq JOO-larda Lý Ban atyndaǵy úsh sheberhana jumys isteıtinin atap ótti.
Budan bólek, ol sheteldik ýnıversıtettermen birlesken bilim berý baǵdarlamalary kóbeıgen saıyn olardyń sapasyna ortaq talaptar qajet ekenin eske saldy.
- Sheteldik ýnıversıtettermen birlesken bilim berý baǵdarlamalary kóbeıip keledi. Sondyqtan olardyń sapasyna qoıylatyn ortaq talaptardy aıqyndaý qajet, – dedi Talǵat Eshenqulov.
Aıta keteıik, buǵan deıin Qazaqstanda JOO-lardy akkredıtteý talaptary jańartylatyny habarlandy.
