Qazaqstanda 31 jeltoqsan demalys kúni dep jarııalana ma
ASTANA. KAZINFORM — Eńbek jáne halyqty áleýmettik qorǵaý mınıstrligi 31 jeltoqsandy resmı demalys kúni retinde belgileý múmkindigine qatysty túsinikteme berdi.
— Biz bul máseleni birneshe ret qarastyrdyq. Halyqaralyq tájirıbeni zerdeledik, ıaǵnı ózge de elderde 31 jeltoqsan jumys kúni retinde belgilengen. Basqa da memleketterde 1 jáne 2 qańtar mereke kúnderi sanalady, — dedi Eńbek jáne halyqty áleýmettik qorǵaý mınıstrliginiń Eńbek jáne áleýmettik áriptestik departamenti basqarmasynyń basshysy Shalqar Orazbekov.
Onyń aıtýynsha, qazir Qazaqstanda 31 jeltoqsandy demalys kúni dep jarııalaý máselesi qarastyrylyp jatqan joq.
Sonymen qatar ol jekelegen kásiporyndar ózderiniń ishki tártip erejeleri aıasynda jumys kúnin qysqartýǵa nemese 31 jeltoqsandy demalys kúni dep jarııalaýǵa quqyly ekenin túsindirdi.
Budan buryn habarlanǵandaı, sýbsıdııalanatyn jumys oryndaryn iske asyrý tártibine ózgeris engizilip jatyr.