Qazaqstanda 3,1 mlrd teńgege jýyq qarajatpen baılanysy bar qumar oıyn shemasy ashyldy
ASTANA. KAZINFORM – Qazaqstan aýmaǵynda zańsyz qumar oıyn qyzmetin uıymdastyrý faktisi anyqtaldy, onyń negizinde «bingo37.pro» onlaın-platformasy paıdalanylǵany belgili boldy.
Qarjylyq monıtorıng agenttiginiń málimetinshe, bul servıs myńnan astam oıyn túrine, sonyń ishinde «Crazy Monkey», «Keno», «Euro Game» sııaqty tanymal oıyndarǵa qoljetimdilik usynǵan. Oıynshylardy tartý Telegram jáne WhatsApp messendjerleri arqyly júrgizilip, jarnamalyq materıaldar men bonýstyq baǵdarlamalar arqyly jeńil utysqa qol jetkizýge múmkindik beriletini týraly habarlanǵan.
Qarjy aǵyndaryn jasyrý maqsatynda Grýzııa men Tájikstan azamattary – droperler tartylǵan. Olar Qazaqstanǵa kelip, bank shottary men abonenttik nómirlerdi tirkep, keıin olardy paıdalanbaı, platformany uıymdastyrýshylarǵa bergen. Osy shottar arqyly 3,1 mlrd teńgeden astam qarajat túskeni anyqtaldy. Bul shemanyń qoldanylýy qarjylyq baqylaý men zańdy tekserýlerdi qıyndatqan.
Qylmystyq is aıasynda 2025 jyldyń tamyzynda uıymdastyrýshy Bahtııar Ogly R-ǵa halyqaralyq izdeý jarııalanyp, sot syrttaı qamaýda ustaý túrindegi bultartpaý sharasyn sanktsııalaǵan. 2026 jyldyń qańtarynda ol Grýzııa aýmaǵynda ustalyp, Qazaqstanǵa ekstradıtsııalandy. Sonymen qatar eki avtokólik – PORSCHE CAYENNE jáne LEXUS GX 460 – memleket kirisine tárkilendi.
Tergeý jumystary áli jalǵasyp jatyr.
QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Budan buryn Ázerbaıjan azamatynyń Qazaqstandaǵy zańsyz oıyn bıznesin shetelden basqaryp otyrǵanyn jazǵan edik.