Qazaqstanda 31 myńnan astam sheteldik stýdent oqyp júr

ASTANA. KAZINFORM – Qazaqstan Ortalyq Azııanyń bilim berý habyna aınalýdy kózdeıdi jáne elimizde 16 sheteldik ýnıversıtettiń fılıaldary ashyldy. Bul týraly QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasova aıtyp berdi.

− Búginde elimizdiń joǵary oqý oryndarynda 31 myńnan astam sheteldik stýdentter bilim alýda. Jyl saıyn memleket 200 sheteldik ǵalymdy shaqyrýǵa qarajat bóledi. Ǵylym jáne joǵary bilim mınıstrligi álemniń barlyq negizgi óńirlerinen seriktester tartyp, Qazaqstandy Ortalyq Azııanyń bilim berý habyna aınaldyrý boıynsha eleýli jumys júrgizýde, − dedi G. Jarasova Ortalyq kommýnıkatsııalar qyzmetinde ótken brıfıngte.

Qazirgi ýaqytta 12 eldiń joǵary oqý oryndarymen 34 strategııalyq áriptestik ornatylǵan, onyń ishinde AQSh, Ulybrıtanııa, Italııa, Qytaı, Reseı, Frantsııa, Ońtústik Koreıanyń bedeldi 16 ýnıversıetiniń fılıaly ashyldy.

Fılıaldardyń baǵdarlamalary men mamandyqtarynyń basym bóligi tehnıkalyq beıindegi kadrlardy daıarlaýǵa baǵyttalǵan.

− Jalpy, sheteldik seriktes ýnıversıetterdi irikteýde jekelegen salalardaǵy ekonomıkalyq qajettilik, óńirlerdiń suranystary men usynystary eskerildi. Mysaly, Aqtóbede brıtandyq Heriot Watt ýnıversıtetiniń fılıaly «Elektrotehnıka jáne energetıka»; «Taý-ken isi jáne paıdaly qazbalardy óndirý» boıynsha kadr daıarlaý úshin quryldy. Tarazdaǵy RHTÝ fılıaly Hımııa jáne hımııalyq tehnologııalar salasynda maman daıarlaıdy. Bul tásil túlekterge jergilikti kásiporyndardyń suranysyna saı bolýǵa jáne halyqaralyq deńgeıde básekege qabiletti bolýyna múmkindik beredi, − dedi G. Jarasova.

Buǵan deıin G. Jarasova Qazaqstan JOO-laryna ınjenerlik bilim berýdiń jańa modeli engiziletinin aıtqan edi. Búginde Qazaqstannyń 54 JOO-synda ınjenerler oqytylady, onda 103 myńnan astam stýdent oqıdy.