Qazaqstanda 31 eldiń azamaty emdeldi
ASTANA. QazAqparat - QazAqparattyń resmı saýalyna oraı QR Densaýlyq saqtaý jáne áleýmettik damý mınıstrligi Qazaqstandaǵy medıtsınalyq týrızmniń damýy týraly aqparatpen bólisti.
Vedomstvonyń aqparatyna qaraǵanda, búginde Qazaqstannyń medıtsınalyq qyzmetine júginetin shetel azamattarynyń qatary artyp keledi. Máselen, «Ulttyq medıtsınalyq holdıng» AQ-nyń klınıkalarynda buǵan deıin Reseı men Qyrǵyzstan azamattary ǵana em alsa, búginde olardyń qataryn AQSh, Japonııa Italııa elderinen keletin emdelýshiler qatary tolyqtyrýda.
«2013 jyly 832 sheteldik azamatqa medıtsınalyq qyzmet kórsetildi. Olardyń arasynda Qazaqstannyń, sonymen qatar TMD elderiniń aýmaǵynda jumys isteıtin adamdar bar», - delingen mınıstrlik aqparatynda.
Sonymen, vedomstvo aqparatyna sáıkes elimizde Ulybrıtanııanyń 260, AQSh-tyń 111, Qyrǵyzstannyń 51, Túrkııanyń 50, Reseıdiń 44, Bolgarııanyń 35, Shrı-Lankanyń 23, Fılıppınniń 27 azamaty em alǵan. Búginde Qazaqstan klınıkalarynan álemniń 31 memleketiniń azamattary em alyp úlgerdi.
Sonymen qatar mınıstrlik aqparatyna qaraǵanda, Qazaqstanda sheteldik klınıka joq. Biraq, sheteldik ınvestorlardy jáne klınıka mamandaryn tartýǵa múmkindik beretin memlekettik-jeke seriktestik damý ústinde.
Aıta keterligi, «PatientsVeyondVorders» jýrnalynyń derekterine qaraǵanda, jyl saıyn álemniń shamamen 8 mln. turǵyny shetelde emdeledi eken.
