Qazaqstanda 300-ge jýyq shveıtsarııalyq kompanııa jumys isteıdi
«Shveıtsarııa - Qazaqstannyń eń iri ınvestorlarynyń biri. Ekonomıkamyzǵa tikeleı salynǵan ınvestıtsııalar 32,6 mlrd dollardan asty. Byltyrdyń ózinde Shveıtsarııadan elimizge 2,8 mlrd dollar ınvestıtsııa quıyldy. 300-ge jýyq shveıtsarııalyq kompanııa Qazaqstanda jumys isteıdi. «Novartis», «Glencore International», «Slariant», «Roche Holding», «SGS», «ABB», «Sika», «Bühler Group», «Stadler» sııaqty kompanııalar – salalyq flagmandar», - dedi QR Premer-Mınıstriniń orynbasary – Syrtqy ister mınıstri Murat Nurtileý shveıtsarııalyq dıplomattarmen elordada ótken kezdesýde.
Onyń aıtýynsha, ótken jyldyń aıaǵynda «Qazaqstan temir joly» men «Stadler» kompanııasy uzaq merzimdi ınvestıtsııalyq kelisimge qol jetkizdi.
«Osy oraıda, elimizdiń naryǵyna kirýge nıetti shveıtsarııalyq kompanııalar úshin eń qolaıly jaǵdaı jasaýǵa daıyn ekenimizdi taǵy da rastaımyn. Shveıtsarııamen saýda-ekonomıkalyq baılanysymyz da turaqty nyǵaıyp keledi. Byltyr 1,4 mlrd dollar kóleminde bolǵan taýar aınalymy bıylǵy qańtar-mamyrda 544,8 mln dollarǵa jetti», - dedi Murat Nurtileý.
Mınıstrdiń aıtýynsha, jaqynda Astanada Úkimetaralyq komıssııanyń kezekti otyrysy ótken jáne qos eldiń Іskerlik keńesiniń kelesi basqosýy bıylǵy kúzge josparlanǵan.
«Jan-jaqty áriptestikti nyǵaıtýǵa múddeli ekenimizdi rastap, shveıtsar tarapyn ekonomıkamyzdyń basym salalaryna ınvestıtsııa salýǵa shaqyramyz. Ásirese, hımııa-farmatsevtıka ónerkásibi, mashına jasaý, aýyl sharýashylyǵy, tamaq ónerkásibi, kólik, ınfraqurylym jáne logıstıka salalarynda yqpaldastyqty damytýdyń pármeni zor», - dedi qazaqstandyq dıplomat.
Aıta keteıik, Shveıtsarııa Syrtqy ister federaldyq departamentiniń basshysy Inıatsıo Kassıs Qazaqstanǵa resmı saparmen keldi.
Buǵan deıin I. Kassıs Shveıtsarııanyń halyqaralyq sý bólý máselesinde Qazaqstanǵa járdem kórsetýge daıyn ekenin aıtqan edi.
