Qazaqstanda 300-ge jýyq kásipkerdiń quqyǵy qorǵaldy – Alık Shpekbaev
ORAL. QazAqparat – Kásipkerler quqyǵyn qorǵaý – agenttiktiń basym baǵyttarynyń biri. Bul týraly QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaevtyń óńirge jumys sapary barysynda málim etildi, dep habarlaıdy QazAqparat tilshisi.
Alık Shpekbaev jumys saparynyń ekinshi kúni memlekettik organdar, qarjy ınstıtýttary, tabıǵı monopolııalar sýbektileri, «Azamattarǵa arnalǵan úkimet» memlekettik korporatsııasy ókilderiniń qatysýymen «Bızneske arnalǵan úkimet» front-keńsesiniń múmkindikterimen tanysty.
Munda «bir tereze» qaǵıdaty boıynsha bızneske qajetti barlyq qyzmet kórsetý úderisi ortalyqtandyrylǵan.
«Bıznesti qorǵaý jáne qoldaý – agenttiktiń basty basymdyqtarynyń biri. Tek bıylǵy jyldyń on aıynda biz 300-ge jýyq kásipkerdiń quqyǵyn qorǵap, memlekettik organdardyń kásipkerlik qyzmetke zańsyz aralasýynyń 160 dereginiń jolyn kestik», – dedi A.Shpekbaev.
Agenttik tóraǵasy sondaı-aq «Protecting business and investments» jobasy aıasynda jemqorlyqqa qarsy súıemeldenetin «Kýbleı» jáne «Kvant» kásiporyndarynyń óndiristik tynys-tirshiligimen jáne ónimderimen tanysty. Aıta ketý kerek, eki jyl ishinde óńirde jalpy quny 853 mlrd teńgeni quraıtyn jobalardy jemqorlyqqa qarsy súıemeldeý týraly 22 kelisimge qol qoıyldy.
«Elbasy atap ótkendeı, ekonomıkanyń 60-70 paıyzy shet elderdegideı jeke qolda bolýy tıis. Buǵan qol jetkizý úshin biz jumys istep turǵan bıznesti qorǵap qana qoımaı, bolashaq kásipkerlerge jaıly, turaqty jáne sybaılas jemqorlyqtan taza kásipkerliktiń barlyq jaǵdaılary bar ekenin jáne jyl saıyn tek jaqsara túsetinin kórsetýimiz kerek», – dep málimdedi ınvestorlarmen kezdesýde A.Shpekbaev.
Agenttik basshysy Jáńgir han atyndaǵy Batys Qazaqstan agrarlyq-tehnıkalyq ýnıversıtetinde, servıs jáne jańa tehnologııalar kolledjinde bolyp, sondaı-aq geoportaldy damytýǵa, mobıldi qosymshalar arqyly memlekettik qyzmetterdi tsıfrlandyrýǵa jáne oblys ákimdigine servıstik úlgini engizýge belsendi qatysatyn «Aqjaıyq – adaldyq alańy» jobalyq keńsesiniń qyzmetine den qoıdy.
Ata-analary bas tartqan erekshe qajettilikteri bar balalar da nazardan tys qalmady. A.Shpekbaev pen qoǵam ókilderi Kóshim arnaýly áleýmettik qyzmet kórsetý ortalyǵyna baryp, olardyń qalaı ómir súrip jatqanyna qanyqty.
Batys Qazaqstan oblysyna eki kúndik jumys saparyn azamattyq sektor ókilderimen, oblys aktıvimen, bıznes qoǵamdastyǵy jáne jýrnalıstermen kezdesýmen qorytyndylaǵan A.Shpekbaev sybaılas jemqorlyqqa qarsy zańnamanyń ózekti máseleleri men agenttiktiń bir jyldaǵy jumysy týraly egjeı-tegjeıli aıtyp berdi.
Kezdesý barysynda spıker: «Qazirgi ýaqytta Prezıdenttiń sybaılas jemqorlyqqa qarsy reformalarynyń úshinshi paketin Májilis maquldap, Senatqa berdi. Bul – jemqorlarǵa aıtarlyqtaı áser etetin eń myqty túzetýler. Atap aıtqanda, sheneýnikter úshin sheteldik bankterdegi shottarǵa tyıym salynady, aýyr jáne asa aýyr sybaılas jemqorlyq qylmystary boıynsha shartty túrde merziminen buryn bosatý joıylady. Al quqyq qorǵaý organdarynyń qyzmetkerleri men sýdıalar budan bylaı laýazymdy tulǵalardyń basqa sanattaryna qatysty sybaılas jemqorlyq qylmysy úshin kóbirek jaza alatyn bolady», – dep málimdedi.
Azamattyq qoǵam ókilderiniń negizgi máseleleri turǵyn úı alý, halyqqa áleýmettik járdemaqy berý, jumysqa ornalastyrý jáne kásipkerlikke qatysty boldy.
Alık Shpekbaev qabyldaýǵa kelgen ár turǵyndy tyńdap, azamattardyń túıtkildi máselelerin sheshý boıynsha tıisti jaýaptar men tapsyrmalar berdi.
Eske sala keteıik, budan buryn Alık Shpekbaevtyń jemqorlyqty joıý jáne aldyn alý jumystary is júzinde júrgizilýi tıis ekendigin aıtqanyn jazǵan bolatynbyz.
