Qazaqstanda 300-den astam munaı bazasy tsıfrlyq esep júıesine qosyldy
ASTANA. KAZINFORM — Qazaqstanda munaı ónimderiniń aınalymyn tsıfrlyq baqylaýǵa kóshirý jumystary jalǵasyp jatyr. Bul týraly OKQ-da ótken brıfıngte QR Energetıka vıtse-mınıstri Baqytjan Іlııas málimdedi.
Onyń aıtýynsha, bul baǵyttaǵy negizgi mindet — munaı bazalaryn esepke alý quraldarymen jabdyqtaý jáne Oil Track júıesin damytý. Qazir júıede 325 munaı bazasy tirkelgen. Sonyń 146-sy esepke alý quraldarymen jabdyqtalyp, derekterdi «Aqparattyq-esepteý ortalyǵy» AQ-qa naqty ýaqyt rejıminde joldap otyr.
Sondaı-aq barlyq munaı óńdeý zaýyttary, onyń ishinde shaǵyn MÓZ-der de, esepke alý júıelerimen tolyq qamtylǵan.
— Munaı bazalaryn tolyq jabdyqtaý janar-jaǵarmaı qozǵalysyn ashyq baqylaýǵa alyp, esepke alynbaıtyn kólemderdiń aldyn alýǵa múmkindik beredi, — dedi vıtse-mınıstr.
Mınıstrlik málimetinshe, munaı ónimderiniń qozǵalysyn tsıfrlandyrý naryqtaǵy ashyqtyqty arttyryp, kóleńkeli aınalym táýekelin azaıtýǵa baǵyttalǵan.
Budan bólek, 2025 jyly munaıdy aı saıyn bólýge arnalǵan tsıfrlyq servıs iske qosyldy. Bul júıe munaı óndirýshi kompanııalar, munaı óńdeý zaýyttary jáne tasymaldaýshy uıymdar arasyndaǵy shıkizatty bólý úderisin avtomattandyrady.
Qazir servıske 95 kompanııa qosylyp, 2,5 myńnan astam ótinim qaralǵan. Nátıjesinde jetkizý kestelerin ázirleý jáne bekitý ýaqyty orta eseppen 80%-ǵa qysqardy.
Buǵan deıin Qazaqstanda 37 mln tonna munaı ónimi óndirilgeni habarlanǵan bolatyn.
