Qazaqstanda 300-350 myń otbasy bedeýliktiń azabyn tartyp keledi - doktor S.Baıqoshqarova
ASTANA. 14 maýsym. QazAqparat - Qazaqstanda qoldan uryqtandyrý qyzmeti tym qymbat bolyp tur. Al bedeýliktiń azabyn 300-350 otbasy tartyp keledi.
Búgin Astanada bastalǵan «Bedeýlikti anyqtaý men emdeýdegi ózekti máseleler. Qosalqy reprodýktıvti tehnologııalar» taqyrybyndaǵy V Halyqaralyq ǵylymı-tájirıbelik konferentsııada bıologııa ǵylymdarynyń doktory, reprodýktolog-embrıolog Saltanat Baıqoshqarova málim etti.
Onyń habarlaýynsha, osydan úsh jyl buryn memleket tarapynan ekstrakorporaldy uryqtandyrýǵa 100 kvota bólinse, aǵymdaǵy jyly onyń sany 600-ge deıin jetti. «Aldaǵy ýaqytta qoldan uryqtandyrýdyń tegin qyzmetin 750-ge deıin jetkizý kózdelgen. Alaıda onyń ózi azdyq etedi. Sebebi qazirgi málimetke sáıkes, 300-350 myń otbasy bedeýliktiń azabyn tartyp keledi. Olardyń 30 paıyzy tegin kvotaǵa zárý», - deıdi S.Baıqoshqarova. Ǵalym atap kórsetkendeı, Qazaqstanda memlekettik qyzmet boıynsha bir ekstrakorporaldy uryqtandyrýdyń baǵasy 737 myń teńgeni, ıaǵnı 5 myń dollardy qurap otyr. Al Izraılde ondaı qyzmettiń baǵasy 2,5-3 myń dollarǵa teń. «Al ol elde qoldanylatyn dári-dármekter bizde de bar. Sondyqtan Qazaqstanda qoldan uryqtandyrý qyzmetiniń baǵasyn arzandatýǵa múmkindik jeterlik. Degenmen, balany armandaıtyn qazaqstandyq otbasylar áli kúnge deıin eki ese kóp shyǵyndalýǵa májbúr», - deıdi dáriger.
Aıta keteıik, 1996 jyly «Ekomed» emhanasynda bıologııa ǵylymdarynyń doktory, reprodýktolog-embrıolog Saltanat Baıqoshqarovanyń qatysýymen Qazaqstanda «probırkadaǵy bala» alǵash ret dúnıege keldi. Bıyl ol 17 jasqa tolady. Búginde qoldan uryqtandyrý ortalyqtary Astana, Almaty, Taraz. Shymkent, Aqtóbe jáne Petropavl qalalarynda jumys isteıdi.
