Qazaqstanda 30 sáýirge deıin Konstıtýtsııalyq zań jobalary Memleket basshysyna usynylady
ASTANA. KAZINFORM – QR Prezıdenti Ákimshiliginiń Basshysy Aıbek Dádebaı jańa Konstıtýtsııany iske asyrý boıynsha baqylaýdy bekitti. Qujat mátini adilet.zan.kz júıesinde jarııalandy.
– Qosa berilip otyrǵan Qazaqstan Respýblıkasy Prezıdentiniń «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» 2026 jylǵy 17 naýryzdaǵy № 1206 Jarlyǵyn iske asyrý boıynsha baqylaý (Baqylaý) bekitilsin, - delingen qujatta.
Sonymen qatar buıryqta qurylymdyq bólimsheler Baqylaýdyń múltiksiz jáne ýaqtyly oryndalýyn qamtamasyz etýi qamtylǵan. Onyń oryndalýyn qadaǵalaý Prezıdent Ákimshiliginiń Memlekettik quqyq bólimine júkteldi.
Atalǵan qujat 26 naýryzdan bastap kúshine endi.
Buıryqqa sáıkes, Mádenıet jáne aqparat mınıstrligi 18 naýryzǵa deıin jańa Konstıtýtsııa mátinin «Egemen Qazaqstan» jáne «Kazahstanskaıa pravda» merzimdi basylymdarynda jarııalaýǵa tıis bolǵan.
Al Ádilet mınıstrligi naýryzdyń sońyna deıin jańa Konstıtýtsııa mátinin normatıvtik quqyqtyq aktileriniń etalondyq baqylaý bankine ornalastyrýǵa jaýapty retinde bekitilgen. Ol úshin mátindi «QR Zańnama jáne quqyqtyq aqparat ınstıtýty» ShJQ RMK-ge jiberýge mindettelgen.
Sonymen qatar QR Prezıdentiniń Ákimshiligi múddeli memlekettik organdarmen birlesip, birqatar qujatty 30 sáýirge deıin ázirlep, Memleket basshysynyń qaraýyna engizbek. Olardyń qatarynda «Qazaqstan Respýblıkasynyń Prezıdenti týraly» jáne «Qazaqstan Halyq Keńesi týraly» Konstıtýtsııalyq zań jobalary bar.
Dál osy merzimde, ıaǵnı 30 sáýirge deıin Úkimetke birneshe qujatty daıyndap, QR Parlamenti Májilisiniń qaraýyna engizý tapsyryldy. Olar – «QR astanasynyń mártebesi týraly» jáne «QR ákimshilik-aýmaqtyq qurylysy týraly» zań jobalary.
Budan bólek Úkimet, sondaı-aq ortalyq jáne jergilikti memlekettik organdar 1 shildege deıin normatıvtik quqyqtyq aktilerdi QR Konstıtýtsııasyna sáıkes keltirý jóninde qajetti sharalar qabyldaıdy.
Sonymen birge Úkimet 7 sáýirge deıin QR Konstıtýtsııasyn ilgeriletý jónindegi jospardy bekitpek.
Aıta keteıik buǵan deıin jańa Konstıtýtsııanyń ár babyn zańnamada tápsirlep, iske asyrý qajet ekenin jazǵanbyz.
