Qazaqstanda 30 mln gektarǵa jýyq jer tozǵan – Topyraqty qorǵaý týraly zań ázirlendi
ASTANA. KAZINFORM – Májilistiń Agrarlyq máseleler jónindegi komıtetinde «Topyraqty qorǵaý týraly» depýtattyq zań jobasy jáne oǵan ilespe túzetýler tanystyryldy.
QR AShM Jerge ornalastyrý jumystary jónindegi memlekettik ınstıtýtynyń málimetinshe, búginde elimizde 29,9 mıllıon gektar jer tozǵan. Yqtımal topyraq qunarlylyǵy 17%-ǵa tómendegen, al sýarmaly jerlerdegi sortańdy jerler 35-37%-ǵa artqan. Sonyń saldarynan aýyl sharýashylyǵy ónimin óndirý azaıǵan.
− Ótken jyly «Jaıylymdar týraly» zańǵa jaıylymdardyń tozý protsesteriniń aldyn alýǵa, olardyń jaǵdaıyn túbegeıli jaqsartýǵa baǵyttalǵan, topyraqty qorǵaý máselelerine jáne jasyl ekonomıka negizderine tikeleı qatysty normalar engizildi. Degenmen, qazir egistik alqaptarynyń tozýy, olardyń qarashiriginiń azaıýy qaıtymsyz qarqyn alýda, − dedi Májilis depýtaty, jumys tobynyń jetekshisi Nurjan Áshimbetov.
Aıta keterligi, Jer jáne Ekologııalyq kodeksterde topyraqty qorǵaý salasyndaǵy qatynastardy retteıtin normalar jalpy sıpatta bolady, onda topyraqty qorǵaýdyń quqyqtyq tetikteri men sharalary joq.
− Qoldanystaǵy Jer kodeksinde topyraq bolyp sanalatyn qorshaǵan orta obektilerine (6-baptyń 2-tarmaǵy) qatysty arnaıy zańnamalar qabyldaý kózdelgen.Topyraqty qorǵaýdy quqyqtyq retteý men basqarýǵa keshendi kózqarastyń bolmaýy topyraqtyń odan ári degradatsııalaný, bıologııalyq ónimdiliktiń tómendeýi jáne olardyń ekonomıkalyq jáne ekologııalyq mindetterin oryndamaý qaýpin týdyrady. Osyǵan baılanysty joǵaryda atalǵan zań jobalary ázirlendi, − dep túsindirdi N.Áshimbetov.
Negizgi zań jobasynyń erejeleri topyraq resýrstaryn utymdy paıdalaný, olardy jasyldandyrý, jerdiń nysanaly maqsaty men topyraq qasıetterine baılanysty quqyqtyq rejımge saralanǵan kózqaras, mıneraldy tyńaıtqyshtar men pestıtsıdterdi paıdalanýdy barynsha azaıtý, sondaı-aq topyraqty ekojúıeniń bóligi retinde taný qaǵıdattaryna negizdelgen.
Buǵan deıin Aqtóbe ekologtary topyraq pen ózen sýynyń synamalaryn alyp, lastaýshy zattardy anyqtaǵan edi.