Qazaqstanda 3 myńnan asa dinı birlestik qyzmet etedi
ASTANA. 15 mamyr. QazAqparat - Dinı birlestikterdiń jalpy sanynyń qysqarýy buryn tirkelgen dinı birlestikterdiń úshten biri is júzinde qyzmet etpegendigimen baılanysty. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Din isteri agenttiginiń tóraǵasy Qaırat Lama Sharıf málim etti.
Agenttik basshysy «Dinı qyzmet jáne dinı birlestikter týraly» Zańǵa sáıkes respýblıkanyń konfessııalyq keńistigin bir izge salyp, júıeleýge septigin tıgizgen dinı birlestikterdi qaıta tirkeý úrdisi ótkizilgenin eske salyp ótti.
«Tirkeýge deıin elde 4551 dinı birlestik qyzmet etkenin atap ótý kerek. 2012 jyly 25 qazanda aıaqtalǵan qaıta tirkeýden soń olardyń sany 3088 qurady. Dinı birlestikterdiń jalpy sanynyń qysqarýy buryn tirkelgen dinı birlestikterdiń úshten biri is júzinde qyzmet etpegendigimen baılanysty»,-dedi ol.
Qaırat Lama Sharıftiń sózine qaraǵanda, sondaı-aq, dinı oqý oryndarynyń sany da qysqaryp, buryn qyzmet etken 28 mekemeniń 13-i qaıta tirkeýden ótti.
Buǵan qosa sarapshylar jumysynyń negizinde dinı birlestikterdiń jańa synyptamasy usynyldy. Eger, buryn elde resmı túrde 46 konfessııa men denomınatsııa esepte bolsa, endi olardyń sany 17 konfessııany quraıdy.
