Qazaqstanda 3 myń áskerı mindetti adamdy jaýyngerlik jıyndarǵa tartý sebebi aıtyldy

ASTANA. KAZINFORM – QR Qorǵanys mınıstrligi 3 myń áskerı mindetti adamdy áskerı jıyndarǵa tartý sebebin túsindirdi. 

«Áskerı daıyndyqtyń negizgi maqsaty – áskerı bólimderdiń jaýyngerlik jáne jumyldyrý daıyndyǵyn arttyrý, áskerı daıyndyqtan ótken resýrstardy rezervke daıyndaý jáne jınaqtaý», - delingen mınıstrliktiń Kazinform agenttiginiń resmı saýalyna bergen jaýabynda.

Vedomstvoda áskerı mindettilerdi jumyldyrý arqyly oqý-jattyǵý jıyndary josparly qujattar negizinde júıeli túrde ótkiziletinin túsindirdi.

«Áskerı daıyndyqqa shaqyrylǵandar sanyn arttyrý Qarýly Kúshterdiń jaýyngerlik ázirligin kóterýge baǵyttalǵan. Azamattardy áskerı mamandyǵy boıynsha daıyndaýǵa qatysty máselelerdi sheshý óńirdegi jáne álemdegi geosaıası jaǵdaımen baılanysty emes. Sonymen birge, biz turaqty negizde geosaıası jaǵdaıǵa taldaý jasap kelemiz», - delingen habarlamada.

QR Qorǵanys mınıstrligi 2024 jyly áskerı jıyndarda bir adamǵa jumsalatyn qarajat somasy jaıynda túsinik berdi. 

«Áskerı mindettilerdi jaýyngerlik daıyndyqtan ótkizýge 3000 adamdy shaqyrý josparlanǵan. 2024 jyly osy mindetti óteıtin bir adamǵa 500 000 teńgege jýyq qarjy qarastyrylǵan», - dep atalyp ótken vedomstvo aqparatynda.

Buıryq jobasy 23 qańtarǵa deıin qoǵamdyq talqylaýda boldy. 

Budan buryn habarlanǵandaı, byltyr áskerı mindettiler arasynan áskerı jıynǵa 1,5 myń adam shaqyryldy.