Qazaqstanda 3 kompanııa krıptoaıyrbas boıynsha lıtsenzııa aldy
ALMATY. KAZINFORM — Almatyda ótip jatqan Central Asia Fintech Summit sammıtinde Ulttyq banktiń tsıfrlandyrý jáne ınnovatsııalar basqarmasynyń bastyǵy Arlen Moldabekov krıptoaıyrbas, krıptobırjaǵa qatysty jańashyldyqtardy aıtty.
1 mamyrdan bastap krıpto salasyn Ulttyq bank rettep, kompanııalarǵa lıtsenzııa beredi. Tek lıtsenzııasy bar kompanııalar arqyly krıptomen aınalysý zańdy.
— Kase qarjy bırjasy tokendeý jáne tsıfrlyq operatsııany júzege asyrý boıynsha birinshi bolyp lıtsenzııany aldy. 3 kompanııa krıptoaıyrbas jasaý boıynsha lıtsenzııaǵa ıe. Al 5 kompanııaǵa lıtsenzııa berý máselesi qarastyrylyp jatyr, — dedi Arlen Moldabekov.
Tolyq lıtsenzııaǵa ıe kompanııalar: Binance Kazakhstan, Bybit Kazakhstan jáne ATAIX Eurasia.
Ulttyq bank ókiliniń aıtýynsha, ulttyq krıptorezerv quryldy. Sondaı-aq eldegi jańa salany damytý úshin halyqaralyq kompanııalarmen yntymaqtastyq júrgizilgenin aıtty.
— Tsıfrlyq aktıvterge baılanysty Caesar kompanııasymen ózara yntymaqtastyq boıynsha memorandýmǵa qol qoıdyq. Binance-pen jumys istep jatyrmyz, — dedi Moldabekov.
Aıtýynsha, buǵan deıin krıpto salasy elde zańsyz bolǵandyqtan, azamattar onyń jasyryn jolyn izdeımin dep alaıaqtyq shemaǵa túsip qalatyn. Endi tokenızatsııa zańdy boldy.
Ol krıptobırja boıynsha dúnıejúzilik kompanııalardyń elge kelýi naryqty damytyp, kóp qarjy ákeletinin aıtty.
Eske salsaq, Alataý qalasynda «krıptoqala» tujyrymdamasy engiziletinin habarladyq.
