Qazaqstanda 3,4 myń shaqyrymnan astam avtojol jóndeledi - A. Jumaǵalıev
ASTANA. 21 qazan. QazAqparat - Búginde Qazaqstanda 3,4 myń shaqyrymnan astam avtojol jóndelýde. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Kólik jáne komýnıkatsııa mınıstri Asqar Jumaǵalıev málim etti.
«Avtojol salasynyń bıýdjeti - 310 mlrd. teńge, onyń ishinde respýblıkalyq jeli bıýdjeti 235,3 mlrd. teńgeni quraıdy. Biz 3485 shaqyrym jolda jóndeý jumystaryn júrgizýdemiz, onyń 2 myń shaqyrymy jol qozǵalysyna ashý josparlanýda. Bul rette, biz joldardyń jaǵdaıyn 2 paıyzǵa jaqsartýdy kózdep otyrmyz», - dedi ol.
Sonymen qatar óz sózinde taıaýdaǵy Úkimettiń keńeıtilgen otyrysyndaǵy Elbasy N.Nazarbaev tarapynan joldarǵa qatysty synnyń ádil bolǵandyǵyn basa aıtqan mınıstr: «Memleket basshysy eldegi joldarǵa qatysty syndy óte ádil aıtty. Búgingi tańda salada birqatar problemaly máseleler bar. Bular: zańnamalyq baza men basqarý qurylymynyń jetildirilmeýi, jóndeý jumystarynyń sapasy, avtojoldardyń jaı-kúıiniń qanaǵattanarlyqsyzdyǵy, avtojoldardy jóndeý men ustap turýǵa qarjylandyrýdyń jetkiliksizdigi, úlken júk kólikteriniń shamadan tys júk tasymaldaýy, joldardaǵy qaýipsizdikti qamtý sharalarynyń jetkiliksizdigi jáne servıs jelisiniń joqtyǵy», - dedi A.Jumaǵalıev.
