Qazaqstanda 29 myńdaı úkimettik emes uıym bar

NUR-SULTAN. QazAqparat - Búgin Dúnıejúzilik úkimettik emes uıymdar kúni. Osyǵan oraı elordadaǵy respýblıkalyq volonterlerdiń front-keńsesinde birqatar sharalar ótti, dep habarlaıdy QazAqparat.

«2014 jyldan bastap Dúnıejúzilik úkimettik emes uıymdar kúni atalyp ótedi. Búgingi tańda elimizde 29 myń osyndaı uıym bar. Ókinishke oraı, olardyń kóbi belsendi emes. Úkimettik emes uıymdarǵa maqsatqa jetý jáne ártúrli sharalar ótkizý úshin 20 mlrd teńge bólinedi. Búgingi otyrysqa qatysýshylardyń árqaısysy azamattyq qoǵamnyń damý kontseptsııasyn daıyndady», - deıdi QR Aqparat jáne qoǵamdyq damý vıtse-mınıstri Ǵabıdýlla Ospanqulov.

Úkimettik emes uıymdar kúnin atap ótý barysynda sheberlik synyptary, áleýmettik jobalar kórmesi ótti.

«Búgin áriptesterimizben kásibı merekemizdi atap ótý úshin jınaldyq. Qazaqstan boıynsha jumys istep, áleýmettik máselelerdi sheship júrgen kommertsııalyq emes uıymdarǵa alǵys aıtamyz. Olar erekshe qajettiligi bar balalarmen jumys isteıdi, AIV jáne týberkýlezge qatysty máselelerdi sheshedi, sondaı-aq adamdardyń quqyǵyn qorǵaıdy», - deıdi «KAMEDA» qoǵamdyq qorynyń dırektory, Nur Sultan qalasynyń Azamattyq bastamalar ortalyǵynyń jetekshisi Mahabbat Espenova.