Qazaqstanda 29 myń adam túrmede jazasyn ótep jatyr
NUR-SULTAN. QazAqparat - Qazaqstanda ishki ister organdaryna júrgizilgen reformalardyń arqasynda 25 jylda túrmede jazasyn ótep jatqandardyń sany 96 myńnan 29 myń adamǵa azaıǵan, dep habarlaıdy QazAqparat tilshisi.
«Sońǵy 25 jyldyń ishinde sottalǵandardyń sany jaǵynan úshinshi orynda turǵan Qazaqstan 72-shi orynǵa kóterildi. Bul degenińiz - túrmedegi azamattardyń sanyn úsh jarym esege azaıttyq degen sóz. Bul nátıjeli jumys Elbasynyń saıasaty men el basshylyǵynyń salıqaly saıasatynyń arqasynda iske asyrylǵanyn atap ótý kerek. Buryn sotqa tartylǵandardyń 80-90 paıyzyna deıin bas bostandyǵynan aıyrylatyn. Al qazir tek 40 paıyzy ǵana túrmege qamalýda. Biz halyqaralyq standartqa jetýimiz kerek. Ol standart boıynsha sotqa tartylǵandardyń 10 paıyzy ǵana túrmede jazasyn óteýi kerek. Bul kórsetkishke aqyryndap jaqyndap kelemiz», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev ІІM-de ótken otyrysta.
Alık Shpekbaev shırek ǵasyr buryn túrmede jazasyn ótep jatqan adamnyń sany 96 myń bolǵanyn atap ótti. Qazirgi ýaqytta 29 myń adam túrmede otyr.
«Bul kórsetkish azaıyp keledi. Mine, reforma degen sóz. Osy birlesken jumystyń nátıjesin kórip otyrmyz», - dep túıindedidi ol.
Aıta ketsek, búgin elordada ІІM men Memlekettik qyzmet isteri jáne sybaılas jemqorlyqqa qarsy is-qımyl agenttigi basshylyǵy azamattyq qoǵam jáne BAQ ókilderimen kezdesý ótkizdi. Kezdesýde ishki ister mınıstrliginiń Jol kartasy negizinde qoǵamdastyq jáne vedomstvolar ázirlegen ishki ister organdaryndaǵy jemqorlyqpen kúrestiń úshjaqty jospary tanystyryldy.
«Reforma baǵdarlamasyn ázirleýde belsendi túrde atsalysyp júrgen azamattarǵa erekshe alǵysymdy aıtqym keledi. ІІM Sizdermen árdaıym birlese eńbek etýge daıyn. ІІM tek synnyń astynda qalatyn organ emes, senimge ıe bolǵanyn qalaımyz», - dedi ishki ister mınıstri Erlan Turǵymbaev.
