Qazaqstanda 270 myńǵa jýyq adam tumaýǵa qarsy ekpe aldy

NUR-SULTAN. QazAqparat – Elimizde 270 myńǵa jýyq adam tumaýǵa qarsy ekpe aldy. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«15 qyrkúıekte tumaýǵa qarsy vaktsınatsııa naýqany bastaldy. Aǵymdaǵy epıdemıologııalyq maýsymǵa biryńǵaı dıstrıbıýtor – «SQ - Farmatsııa» JShS tumaýǵa qarsy vaktsınanyń 2 526 754 dozasyn satyp aldy. Bul respýblıkanyń jalpy turǵyndarynyń 13 paıyzyn qamtýǵa múmkindik beredi», - dedi mınıstr.

Onyń atap ótýinshe, medıtsına qyzmetkerler, medıtsınalyq uıymdarda dıspanserlik esepte turǵan balalar, jetim balalar jáne ata-anasynyń qamqorlyǵynsyz qalǵan balalarǵa arnalǵan bilim berý uıymdaryndaǵy jetkinshekter vaktsınatsııamen birinshi kezekte qamtylady.

«Búginde shamamen 270 myń adam nemese halyqtyń ekpe alýǵa jatatyn sanatynyń 10,5 paıyzy ekpe aldy», - dedi Alekseı Tsoı.