Qazaqstanda 2,7 mıllıon áıel sportpen shuǵyldanady
ASTANA. KAZINFORM - QR Týrızm jáne sport mınıstri Erbol Myrzabosynov OA boıynsha «BUU-Áıelder» keńsesi basshysy Djeren Gıýven Gıýrespen kezdesý barysynda osyndaı málimetter keltirdi.
Mınıstrliktiń baspasóz qyzmetiniń habarlaýynsha, kezdesý barysynda taraptar týrızm jáne sport salalaryndaǵy yntymaqtastyqty nyǵaıtý, sondaı-aq genderlik teńdikti ilgeriletý, áıelderdiń quqyqtary men múmkindikterin keńeıtý máselelerin talqylady.
Erbol Myrzabosynov Qazaqstanda áıelder men qyzdardy sportqa tartýǵa erekshe kóńil bólinetinin atap ótti.
2025 jyldyń qorytyndysy boıynsha elde 3 jastan 65 jasqa deıingi jáne odan jasy úlken shamamen 2,7 mıllıon áıel sportpen shuǵyldanady. Bul – eldegi áıelderdiń 26,4 paıyzy. Atalǵan kórsetkish sporttyń áıelder men qyzdardyń ómiriniń ajyramas bóligine aınalyp kele jatqanyn, densaýlyqty nyǵaıtýǵa, áleýmettik ıntegratsııaǵa jáne kóshbasshylyq qasıetterdi damytýǵa yqpal etetin mańyzdy qural ekeniniń kórinisi.
Mınıstr otandyq sportshy áıelderdiń Qazaqstannyń halyqaralyq ımıdjin nyǵaıtýǵa qosqan zor úlesin erekshe atap ótti.
Qazaqstan álemdik arenada joǵary jetistikke jetken áıel chempıondarymen maqtanady. Olardyń qatarynda 1994 jyly Qazaqstan atynan tuńǵysh ret Olımpıadada konkımen júgirýden óner kórsetken Kenjesh Sársekenova, qysqy Olımpıadada el qorjynyna alǵashqy júldeni salǵan Lıýdmıla Prokasheva, dzıýdodan álem chempıonatynyń tuńǵysh júldegeri Ábıba Ábýjaqynova, Olımpıada chempıony Olga Shıshıgına, Olımpıadada úsh márte júlde alǵan jeńil atlet Olga Rypakova, sondaı-aq bokstan úsh dúrkin álem chempıony Nazym Qyzaıbaı bar.
Kezdesý barysynda týrızm salasyndaǵy áıelderdiń róline de erekshe nazar aýdaryldy. Áıelder salanyń bet-beınesin qalyptastyryp, týrıstik qyzmetterdiń sapasyn qamtamasyz etýde mańyzdy orynǵa ıe. Sondaı-aq áıelder mádenı murany saqtap, urpaqtan-urpaqqa jetkizýshi ári halyqaralyq gýmanıtarlyq jáne mádenı baılanystardyń damýyna yqpal etedi.
Erbol Myrzabosynov «BUU-Áıelder» keńsesine turaqty damý men teń múmkindikter qaǵıdattaryna negizdelgen óńirlik kún tártibin qalyptastyrýǵa qosqan úlesi úshin alǵys bildirdi.
Kezdesý qorytyndysynda taraptar seriktestikti odan ári nyǵaıtýǵa jáne birlesken jobalardy iske asyrýǵa daıyn ekenderin jetkizdi.
Osyǵan deıin Erbol Myrzabosynov bolashaq chempıondardy daıyndaý úshin bastapqy irgetas durys qalyptasý kerek ekenin aıtqan bolatyn.