Qazaqstanda 27 mamyr kúni jel kúsheıip, jaýyn jaýady
ASTANA. QazAqparat - Qazaqstannyń basym bóliginde jeksenbi, 27 mamyr kúni atmosferalyq frontaldy bólikterdiń ótýine baılanysty eldiń soltústiginde jaýyn jaýyp, respýblıkanyń ózge aýmaqtarynda jel kúsheıip, naızaǵaı oınaıdy. Keı jerlerge burshaq jaýýy da yqtımal. Ońtústikte shańdy daýyl kóterilse, soltústikte tuman túsedi.
«Qazgıdromet» RMK-nyń aqparattary boıynsha, Qyzylorda oblysynda jel sekýndyna 15-20 metr keı jerlerde 25 metr jyldamdyqpen soǵady, ekpini 20 metr bolady dep kútilýde. Birqatar aýmaqtarda naızaǵaı oınap, shańdy daýyl kóterilip, burshaq jaýýy da múmkin.
Ońtústik Qazaqstan oblysynda jel kúsheıip, túnde jyldamdyǵy sekýndyna 15-20 metrge jetip, kúndiz 15-20 metr bolady. Keı jerlerde ol 23-28 metrge deıin barady. Birqatar aımaqtarda shańdy daýyl kóteriledi.
Jambyl oblysynyń birqatar aımaqtarynda sekýndyna 15-20 metr jyldamdyqpen jel turyp, ekpini 23-28 metrge jetedi. Kúndiz naızaǵaı jarqyrap, burshaq jaýýy yqtımal.
Aqmola oblysynda sekýndyna 15-20 metr jyldamdyqpen jel soǵady. Sondaı-aq jel kúsheıip, túnde jáne tań ata keıbir aımaqtarda tuman túsedi.
Mańǵystaý oblysynda túnde jeldiń jyldamdyǵy sekýndyna 16-21 metrge jetedi, ekpini 25 metr bolady. Keı jerlerde jel kúndiz sekýndyna 15-20 metr jyldamdyqpen soǵyp, shańdy daýylǵa ulasady.
Qostanaı, Soltústik Qazaqstan, oblystarynda jel sekýndyna 15-20 metr jyldamdyqpen uıtqıdy. Keı jerlerde jeldiń ekpini sekýndyna 23-28 metr bolady. Sondaı-aq tuman túsip, burshaq jaýýy múmkin.
Pavlodar oblysynda jeldiń jyldamdyǵy 15-20 m/s, keı jerlerde ekpini 25 metr bolady.
Qaraǵandy oblysynyń birqatar aýmaqtarynda jyldamdyǵy sekýndyna 15-20 metr jyldamdyqpen jel soǵady, ekpini 23 metr.
Shyǵys Qazaqstan, Almaty, oblystarynyń keı jerlerinde jel sekýndyna 15-20 metrge deıin kúsheıedi, Almaty oblysynda kúndiz burshaq jaýýy yqtımal.
Atyraý, Aqtóbe, túnde Batys Qazaqstan oblystarynyń keı jerlerinde sekýndyna 15-22 metr jel soǵady. Aqtóbe oblysynda túnde jáne tań ata burshaq jaýady.
