Qazaqstanda 250-ge jýyq sýdıa jetispeıdi

ASTANA. QazAqparat - Sýdıalardyń shamadan tys jumys júktemesi olardyń densaýlyǵyna, otbasylyq ómirine qatty áser etkendikten, sýdıalar qyzmetinen ketýge májbúr. Bul týraly QR Joǵarǵy Sotynyń qylmystyq ister jónindegi sot alqasynyń tóraǵasy Abaı Rahmetýlın málim etti, dep habarlaıdy QazAqparat.

«Sheshimin tappaǵan birqatar máseleler bar. Olardyń biri sýdıalarǵa júktelgen jumystyń shamadan tys kóp bolýy. Bir sýdıaǵa júktelgen ortasha aılyq jumys tizbeginde 147 is pen materıaldar qamtylǵan. Osy oraıda sýdıa kúnine kem  degende 7-8 isti qarap shyǵýy tıis, sondaı-aq olar boıynsha sheshim jasaýy kerek», - dedi A. Rahmetýlın sýdıalardy irikteý júıesin jańǵyrtý taqyrybyna arnalǵan dóńgelek ústel otyrysynda.

Sonymen qatar ol jyl saıyn sot qaraýyna engiziletin ister sany artyp kele jatqanyn atap ótti. Sondyqtan sýdıalar demalys jáne mereke kúnderi de jumysqa shyǵýǵa májbúr.

«Tájirıbe kórsetip otyrǵandaı, osyndaı júkteme olardyń densaýlyǵyna, otbasylyq ómirine áser etýde. Sonyń kesirinen kásibı sýdıadar óz erkimen qyzmetinen ketip jatady. Búginde elimiz boıynsha sýdıa qyzmetine 245 bos oryn bar», - dedi QR Joǵarǵy Sotynyń qylmystyq ister jónindegi sot alqasynyń tóraǵasy.

Budan buryn habarlanǵandaı, dóńgelek ústel otyrysynda Astanada ornalasqan EQYU baǵdarlamalary keńsesiniń basshysy Derd Sabo qazaqtyń úsh bıi sýdıalardy tárbıeleý isinde óte jaqsy úlgi bolyp otyrǵandyǵyn aıtqan bolatyn.