Qazaqstanda 250-den astam tsıfrlyq joba iske asyryldy
ASTANA. KAZINFORM – Qazaqstanda tsıfrlyq jobalardy qarjylandyrýdyń jańa tetigi engizilip, onyń nátıjesinde 250-den astam joba iske asyryldy. Bul týraly Úkimet otyrysynda Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev málim etti.
Mınıstrdiń aıtýynsha, memlekettik qoldaý sharalarynyń ashyqtyǵy men tıimdiligin arttyrý maqsatynda astanahub.com platformasy negizinde Ulttyq ınnovatsııalyq júıeniń biryńǵaı terezesi iske qosylǵan.
– Qazaqstanda alǵash ret ǵylymı ınfraqurylym derekteri tolyq tsıfrlandyryldy. Qazirgi tańda platformada 2000-nan astam IT-kompanııa, 100-den astam ónerkásip kásiporny jáne 900-den astam ǵylymı uıym men zerthana biriktirilgen. 2025 jyly portalǵa 1,7 mln paıdalanýshy kirip, jalpy qaralym sany 35 mln-nan asty, – dedi Jaslan Mádıev.
Onyń sózinshe, tsıfrlyq jobalardy qarjylandyrýdyń turaqty tetigi qalyptasqan.
– Jer qoınaýyn paıdalanýshylardyń 1% aýdarymdary esebinen 120-dan astam kásiporyn qamtylyp, 250-den astam tsıfrlyq joba iske asyryldy. Bul jobalardy júzege asyrýǵa 280-ge jýyq otandyq IT-kompanııa tartyldy. Jalpy qarjylandyrý kólemi 32 mlrd teńgeni qurady, – dedi mınıstr.
Mınıstr naqty jobalardyń nátıjesine de toqtaldy. Onyń aıtýynsha, Qyzylorda oblysynda engizilgen «Tsıfrlyq ken orny» jobasy munaı alý koeffıtsıentin 92%-ǵa deıin arttyrǵan. Sonymen qatar shyǵyndar 10%-ǵa qysqaryp, basqarý tıimdiligi 20%-ǵa ósken.
Al Abaı oblysynda engizilgen pozıtsııalaý júıesi óndiris alańyndaǵy qyzmetkerlerdiń ornalasqan jerin 1 metrge deıingi dáldikpen anyqtaýǵa múmkindik beredi. Bul óz kezeginde óndiristegi qaýipsizdikti arttyrýǵa yqpal etedi.
Jaslan Mádıevtiń sózinshe, tsıfrlyq jobalardy qarjylandyrý tetigi aldaǵy ýaqytta odan ári jetildiriledi.
– Jańartylǵan tásilge sáıkes, qarjynyń 0,5%-y Astana Hub arqyly tsıfrlandyrýǵa, al taǵy 0,5%-y ǵylymı-zertteý jumystaryna baǵyttalady. Barlyq protsesterdiń ashyqtyǵy biryńǵaı tereze arqyly onlaın rejımde qamtamasyz etiledi. Sonymen qatar monıtorıng júıesi jasandy ıntellekt quraldary arqyly kúsheıtiledi, – dedi ol.
Aıta keteıik, buǵan deıin Jaslan Mádıev ınnovatsııalyq jobalarǵa salynǵan árbir teńge eki ese qaıtarym berip otyrǵanyn málimdegen edi.
