Qazaqstanda 25 jylda túrmede otyrǵandardyń sany 3 ese azaıdy
«Memleketimiz quqyqtyq júıeni izgilendirý, ıaǵnı gýmanızatsııa jolyn tańdady. Sondaı-aq, bizdiń bul tájirıbemizdi halyqaralyq sarapshylar alǵa basýshylyq dep baǵalaýda. Jalpy alǵanda 25 jylda túrmede otyrǵandardyń sany 3 ese azaıdy. Eger 1991 jyly Qazaqstan 100 myń adamǵa shaqqanda túrmede otyrǵandardyń koeffıtsıenti boıynsha álemde 3-shi orynda bolsa, al 2016 jyly elimiz atalǵan kórsetkish boıynsha 62-shi orynǵa tómendedi», - dedi ol.
Sonymen qatar Mámı sońǵy jyldary otandyq sottar sot isin júrgizýde aqparattyq tehnologııalardy tolyq meńgerip alǵandyǵyn atap ótti. Búginde kóptegen elderdiń ókilderi bizdiń elektrondy is júrgizý tájirıbemizdi úırený úshin Qazaqstanǵa úmit artyp otyrǵandyǵyn basa aıtty.
«Ult josparynyń zań ústemdigin qamtamasyz etýge baılanysty 2-shi reformasy óz ýaqytynda, ári tıisti deńgeıde iske asyrylýda. Barlyq qajetti zańdar qabyldandy. Jańa normalar sottardyń tájirıbesine sátti engizilýde. Nátıjesinde otandyq sot júıesi aıtarlyqtaı jańardy. Jalpy alǵanda QR Joǵarǵy soty Ult jospary boıynsha ózine júktelgen 10 qadamnyń barlyǵyn tolyqtaı oryndady. Sonymen qatar VI sezde qabyldanǵan qararlardyń barlyǵy júzege asty»,- dedi Joǵarǵy sot tóraǵasy.
