Qazaqstanda 25 jylda A vırýstyq gepatıti 308 esege azaıdy
QR Densaýlyq saqtaý jáne áleýmettik damý mınıstrliginiń baspasóz qyzmetiniń habarlaýynsha, keń kólemdi vaktsınalaý, sýdyń sapasyn jaqsartý men azamattardyń sanıtarlyq saýattylyǵyn arttyrýdyń nátıjesinde sońǵy 25 jylda Qazaqstanda balalar arasyndaǵy A vırýstyq gepatıtimen syrqattaný 308,5 esege tómendedi.
2015 jyly 14 jasqa deıingi balalar arasyndaǵy A gepatıtimen syrqattanýdyń 140 jaǵdaıy (100 myń turǵynǵa shaqqandaǵy kórsetkish - 3,08) tirkeldi.
1991 jyly bul kórsetkish 43201 (100 myń turǵynǵa shaqqandaǵy kórsetkish - 807) boldy. Sonymen qatar, 2015 jyly eresek turǵyndar arasyndaǵy A gepatıtimen syrqattanýdyń 358 jaǵdaıy (100 myń turǵynǵa shaqqandaǵy kórsetkish - 2,07) tirkelse, 1991 jyly 55662 jaǵdaı (100 myń turǵynǵa shaqqandaǵy kórsetkish - 331,1) tirkelgen bolatyn.
A gepatıti (Botkın aýrýy) - A vırýstyq gepatıtinen týyndaıtyn baýyrdyń jiti juqpaly aýrýy. Bul negizinen juqpaly aýrýǵa shaldyqpaǵan (nemese vaktsınalanbaǵan) adam aýrýdy juqtyrǵan adamnyń fekalııimen lastanǵan azyq-túlik pen sýdy qoldanǵan ýaqytta juǵady. Aýrý qaýipsiz sýdyń bolmaýymen, sanıtarlyq jaǵdaıdyń jáne jeke gıgıenanyń saqtalmaýymen tyǵyz baılanysty.
Kóp jaǵdaıda A gapatıtin qoldaryn taza ustamaıtyn balalar juqtyrady. Sondyqtan gapatıttiń bul túrin «jýylmaǵan qol aýrýy» dep ataıdy.
Inkýbatsııalyq kezeń orta eseppen 35 kún bolyp sanalady (7-50 kún aralyǵy).
99% jaǵdaıda adamdar saýyǵyp ketedi, degenmen, 1%-dyq jaǵdaı ólimmen aıaqtalýy múmkin. Asqyný jaǵdaıy eresekterge tán, vırýstyq jáne vırýstyq emes etıologııasy bar baýyr aýrýlarynyń kez kelgen túrimen aýyratyn adamdarda kezdesedi.
Aýrýdy juqtyryp almaý úshin jeke gıgıena tártipterin saqtaý kerek, tek taza sý iship, jemis-jıdekter men kókenisterdi qaınatylǵan sýmen jýý shart.
Sonymen qatar, aýrýdyń aldyn maqsatynda ımmýndaý qoldanylady. Epıdemıologııalyq kórsetkishter boıynsha A vırýstyq gepatıtine qarsy vaktsınalaý aýrý kórsetkishi joǵary aımaqtardaǵy balalarǵa jergilikti atqarýshy organ qarajatynyń esebinen júrgiziledi.