25 qyrkúıek Qazaqstanda jalpyulttyq aza tutý kúni bolady
ASTANA. KAZINFORM — Mańǵystaýda áskerı qyzmetshilerdiń qaza bolýyna baılanysty Qazaqstanda aza tutý jarııalandy, dep habarlaıdy Aqordanyń baspasóz qyzmeti.
— Memleket basshysynyń ókimimen Mańǵystaý oblysynda qyzmettik mindetterin atqarý kezinde áskerı qyzmetshilerdiń qazaǵa ushyraýyna baılanysty Qazaqstan Respýblıkasynda 2026 jylǵy 25 qyrkúıekte jalpyulttyq aza tutý jarııalandy, — delingen habarlamada.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Budan bólek, Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy. Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna baryp, áli tabylmaǵan áskerı qyzmetshilerdi úzdiksiz izdestirýdi tapsyrdy.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
