Qazaqstanda 248 bala byltyr jol apatynan mert boldy
ASTANA. QazAqparat – Ótken jyly jol apatynan 248 bala mert boldy. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.
«Taldaý kórsetkendeı, balalarmen bolǵan jol-kólik oqıǵalarynyń 90 paıyzǵa jýyǵy júrgizýshilerdiń kinásinen jasalady. Kóp jaǵdaıda zardap shekken balalardy eresekter avtomobılderde tasymaldaý erejelerin buza otyryp, arnaıy ustaǵysh qurylǵylarsyz nemese qaýipsizdik beldikterin paıdalanbaı tasymaldaıdy.
Sonymen qatar kóbinese joldardyń janynda abaısyzdyqtan (uıaly telefondardy, qulaqqaptardy jáne taǵy basqasyn paıdalaný) joldyń belgilenbegen jerinen, baǵdarshamnyń tyıym salynǵan belgisine nemese jaqyn kele jatqan kóliktiń aldynan ótý sebepteri boıynsha balalar jol-kólik oqıǵasynyń kinálilerine aınalady», - dep atap ótedi birinshi vıtse-premer jaýabynda.
Onyń dereginshe, 2022 jyly kámeletke tolmaǵandarmen bolǵan jol-kólik oqıǵalarynyń sany 15 paıyzǵa (2 939-dan 3 385-ke deıin) artqan. Sonyń saldarynan qaıtys bolǵan balalar sany 24 paıyzǵa (200-den 248-ge deıin) jáne jaralanǵandar sany 20 paıyzǵa (3 333-ten 3 989-ǵa deıin) ulǵaıǵan.
«Іshki ister mınıstrligi múddeli memlekettik organdarmen birlesip, júıeli negizde joldardaǵy balalar ólimin azaıtý, onyń ishinde bilim berý uıymdarynyń janynda tıisti qaýipsiz ınfraqurylymdy qamtamasyz etý jóninde is-sharalar qabyldaýda. Balalar bilim berý mekemeleri ornalasqan aýdandarynda 6 myńǵa jýyq jaıaý júrginshiler ótkeli, onyń ishinde 1,3 myń retteletin, sondaı-aq labırınttik úlgidegi 5,6 myń jaıaý júrginshiler qorshaýy, 3 myńnan astam kólik turaǵy uıymdastyrylǵan. Bilim berý uıymdarynyń janynda 4 myńnan astam jasandy jol budyrlary, 11 myńnan astam «Balalar» jol belgileri ornatylǵan», - dedi ol.
