Qazaqstanda 24 kóterme-taratý ortalyǵy salynady

NUR-SULTAN. QazAqparat – Qazaqstanda 24 kóterme-taratý ortalyǵy salynady. Bul týraly Saýda jáne ıntegratsııa mınıstri Baqyt Sultanov málim etti, dep habarlaıdy QazAqparat tilshisi.

«Ulttyq taýar taratý júıesiniń usynylyp otyrǵan modeli jeke qarjylyq bastama arqyly memlekettik-jekeshelik áriptestik qaǵıdattary boıynsha qurylady. Jelini qurý aıasynda 24 kóterme-taratý ortalyǵyn salý usynylyp otyr. Taýar ótkizý júıesiniń ınfraqurylymy 2,1 mln tonnadan astam taýarlardy qabyldaýǵa, saqtaýǵa qaıta tıeýdi jáne 5 myń adamǵa jumys ornyn qurýdy qamtamasyz etedi», - dedi mınıstr Úkimet otyrysynda.

Onyń sózine qaraǵanda, kóterme-taratý ortalyǵynyń nomenklatýrasy 20 myńnan astam ónim ataýyn quraıdy.

Usynylyp otyrǵan nysanalardy qurý 3 kezeńge josparlanyp otyr.

Birinshi kezeńde 7 nysan boıynsha, onyń ishinde 4 saqtaý jáne 3 taratý ortalyǵyn bıyldyń aıaǵyna deıin, ekinshi kezeńde taǵy 7 nysan boıynsha 2021 jylǵy kóktemge deıin, úshinshi kezeńde – 10 nysan týraly 2021 jylǵy kúzge deıin memlekettik-jekeshelik áriptestik kelisimsharttaryn jasasý usynyldy.

«Qazirgi kezde 7 nysannyń qurylysy boıynsha jobanyń birinshi kezeńin iske asyrý úshin jeke qarjylyq bastama nysanynda jeke ınvestorlardyń konsortsıýmynyń atynan ótinim kelip tústi. Bul konsortsıýmge agroónerkásiptik taýarlarynyń óndirýshileri jáne saýda júıesindegi tulǵalary kiredi. Atalǵan obektiler Pavlodar oblysynyń Mıchýrın aýyly jáne Aqsý qalasynda, Almaty oblysynyń Qapshaǵaı qalasynda, Jambyl oblysy Shý qalasynda, sonymen qatar Nur-Sultan, Shymkent jáne Almaty qalalarynda ornalasatyn bolady», - dep naqtylady vedomstvo basshysy.

Onyń aıtýynsha, kóterme-taratý ortalyqtarynyń ınfraqurylymy Reseı, Ózbekstan jáne Qyrǵyzstannyń saýda-taratý júıelerimen ıntegratsııalanýǵa múmkindik beredi.

Bul taýarlardy ózara jetkizýdi jáne olardyń Eýrazııalyq ekonomıkalyq odaqtaǵy elderdiń aýmaǵy arqyly tranzıtin qamtamasyz etedi, sondaı-aq Iran, Pákistan, Úndistan jáne Aýǵanstan naryqtaryna qol jetkizýge múmkindik beredi. Eksporttyq áleýet shamamen 1,4 mln tonna ónimdi quraıdy.

«Ulttyq taýar ótkizý júıesiniń aýqymdylyǵyn jáne ony qysqa

merzimde iske asyrý qajettiligin eskere otyryp, múddeli memlekettik organdarǵa salalyq qorytyndylar men kelisýlerdi daıyndaýda kómek kórsetýdi tapsyrýdy suraımyn»,- dedi B. Sultanov.

Budan buryn habarlanǵandaı, mınıstr Ulttyq taýar ótkizý júıesin qurý jumystary týraly túsindirdi.

Usynylyp otyrǵan júıeniń ózegi úsh túrdegi kóterme-taratý ortalyqtarynyń biryńǵaı jelisi bolady.