Elimizde 237 erikti órt sóndirý beketi salyndy: Shyńǵys Árinov Prezıdentke esep berdi
ASTANA. KAZINFORM - Memleket basshysy Tótenshe jaǵdaılar mınıstri Shyńǵys Árinovti qabyldady, dep habarlaıdy Aqordanyń baspasóz qyzmeti.
Qasym-Jomart Toqaevqa vedomstvo jumysynyń nátıjesi, azamattyq qorǵanys júıesin jańǵyrtý barysy jáne aldaǵy kezeńge arnalǵan jospar jóninde baıandaldy.
Prezıdentke Tótenshe jaǵdaılar mınıstrliginiń materıaldyq-tehnıkalyq bazasyn nyǵaıtý sharalary tanystyryldy. Sońǵy eki jylda bólimsheler 1,4 myńnan astam tehnıka, avıatsııa, zamanaýı qutqarý jabdyqtary, ushqyshsyz ushý apparattary jáne baılanys quraldarymen tolyqtyryldy. Bul elimizdiń barlyq óńiriniń tótenshe jaǵdaılar kezinde jedel áreket etý múmkindigin aıtarlyqtaı arttyrdy. Sonymen qatar mınıstrlikke qarasty bólimshelerdi jańǵyrtý jumystary qolǵa alyndy.
Shyńǵys Árinov bólimsheler jelisin damytý máselesine toqtalyp, jańa ámbebap qutqarý qurylymdary, avıatsııa jáne teńiz jasaqtary qurylǵany jóninde aıtty. «Aýyl qutqarýshylary» baǵdarlamasy aıasynda 237 erikti órt sóndirý beketi salynǵan. Olar shamamen 700 eldi mekenniń qaýipsizdigin qamtamasyz etedi.
Halyqty jappaı shuǵyl habardar etý júıesin damytý jumystary jalǵasyp, Ahýaldyq ortalyqtyń múmkindikteri keńeıtilip jatyr. Sondaı-aq tabıǵı órtti erte anyqtaý júıeleri biriktirilýde.
Budan bólek, Qasym-Jomart Toqaevqa vedomstvo qyzmetkerlerin áleýmettik qoldaý sharalary týraly málimet berildi. Qutqarýshylarǵa turǵyn úı tólemderi qarastyrylǵan. Tótenshe jaǵdaılar mınıstrliginiń qyzmetkerleri úshin arnaıy turǵyn úı klasterin qurý jobasy qolǵa alyndy. Atalǵan bastama órt sóndirý bólimderi men qutqarý bazalarynyń janynda qajetti ınfraqurylymy bar turǵyn úı keshenderin salýdy kózdeıdi.
Prezıdent mınıstrliktiń azamattyq qorǵaý júıesin jetildirý boıynsha atqaryp jatqan jumysyn oń baǵalady.
Memleket basshysy jergilikti atqarýshy organdarmen birlese otyryp, aýdandyq jáne aýyldyq qutqarý bólimsheleriniń materıaldyq-tehnıkalyq bazasyn nyǵaıtý is-sharalaryn jalǵastyrý, zamanaýı tehnologııalar engizý jáne órt qaýipsizdigi deńgeıin kóterý jóninde tapsyrma berdi.
Aıta ketıik, osyǵan deıin Memleket basshysy 2027-2029 jyldarǵa arnalǵan bıýdjettiń negizgi basymdyqtaryn aıqyndady.
