Qazaqstanda 232 jańa mektep salynyp jatyr

ASTANA. KAZINFORM – El óńirlerinde 267 myń oqýshy ornyna arnalǵan 232 jańa mekteptiń qurylysy júrgizilip jatyr, dep habarlaıdy Oqý-aǵartý mınıstrligi.

Bıyl 157 myń oqýshy ornyna arnalǵan 105 jańa mektep paıdalanýǵa berildi. Onyń ishinde 135 myń oqýshy ornyna arnalǵan 71 mektep «Keleshek mektepteri» ulttyq jobasy aıasynda salyndy. Jańa mektepterdiń basym bóligi Túrkistan, Mańǵystaý, Almaty, Aqtóbe jáne Jambyl oblystarynda ornalasqan.

- Atalǵan ulttyq joba aıasynda jalpy 460 myń orynǵa arnalǵan 217 zamanaýı mektep salý josparlanǵan, onyń 40%-dan astamy aýyldyq jerlerde boı kóterýde. Jańa formattaǵy mektepter burynǵy tıptik mektepterden edáýir erekshelenedi: olardyń jalpy aýmaǵy 15–20%-ǵa úlken, al tehnıkalyq jabdyqtalý deńgeıi tórt ese joǵary. Ár mektepte robototehnıka kabınetteri, STEM-zerthanalar, horeografııa zaldary, kovorkıng aımaqtary men tórtke deıin sport zaly qarastyrylǵan, - delingen aqparatta.

Sonymen qatar shaǵyn qalalarda, aýdan ortalyqtarynda jáne aýyldarda ornalasqan 1000 mektep jańǵyrtylýda. Baǵdarlama aıasynda kúrdeli jóndeý jumystary, jıhazdar jańartý, kitaphanalar, ashanalar men qaýipsizdik júıeleri jańǵyrtý qarastyrylǵan. Bul óz kezeginde elimizdiń barlyq óńirlerinde balalarǵa jaıly jáne qaýipsiz bilim alý jaǵdaıyn qamtamasyz etedi.

Kelesi kezeńde mektepterdiń ınfraqurylymyn biryńǵaı zamanaýı formatqa kóshirý boıynsha jumystar júrgizilýde. Prezıdenttiń tapsyrmasyna sáıkes mektepterdi renovatsııalaýdyń aýqymdy baǵdarlamasy júzege asyrylýda. Baǵdarlama sheńberinde ǵımarattardyń qasbetteri men shatyrlary jańartylyp, terezeler aýystyrylýda, ınjenerlik jelilerge kúrdeli jóndeý júrgizý, aýmaqtar abattandyrylyp, kógaldandyrylýda.

Aıta keteıik, Abaı oblysynyń Aıagóz aýdanynda 600 oryndyq mektep ashyldy.