Qazaqstanda 23 órt sóndirý deposy apatty jaǵdaıda - Qalmuhanbet Qasymov
ASTANA. QazAqparat - Búgin Parlament Májilisindegi Úkimet saǵatynda Іshki ister mınıstri Qalmuhanbet Qasymov órt sóndirý depolarynyń tapshylyǵy sezilip otyrǵandyǵyn málim etti, dep habarlaıdy QazAqparat.
«Búginde elimizde 422 órt sóndirý deposy bar. Olardyń jartysynan astamy zamanaýı talaptarǵa saı kelmeıtin ǵımarattarda jumys isteıdi. 23- ke jýyǵy apatty jaǵdaıda bolsa, osynshalyqty kólemdegi depo jalǵa alynatyn nysandarda ornalastyrylǵan. Tıisti deńgeıge jetkizý úshin el aýmaǵynda 137 keshen salý kerek. Onyń 111-i qalalyq jerde, al 23-i aýyldyq jerde qajet», - dedi mınıstr.
Osy oraıda ol sońǵy úsh jylda jeti órt sóndirý deposy salynǵanyn, onyń altaýy respýblıkalyq jáne bireýi jergilikti bıýdjet esebinen júzege asyrylǵanyn atap ótti.
«Aǵymdaǵy jyly jaǵdaı ózgermedi. Respýblıkalyq bıýdjet aıasynda tek eki deponyń, ıaǵnı Oral men Mańǵystaý oblysyndaǵy nysannyń qurylysyna qoldaý jasaldy. Bul máselede Astana, Shymkent qalalarynyń jáne Atyraý oblysy ákimdiginiń jumysyn baǵalaýǵa bolady. Olar jergilikti bıýdjet qarjysy esebinen árqaısysy órt sóndirý depsynyń qurylysyn júrgizýde», - dedi Q. Qasymov.
Budan buryn habarlanǵandaı, Úkimet saǵatynda Іshki ister mınıstri elimizdegi kóp órt oqıǵalary tirkelgen 4 oblysty ataǵan bolatyn.
