Qazaqstanda 23 myń kásipker bıznesin ǵalamtor arqyly tirkegen
ASTANA. QazAqparat - 23 005 zańdy tulǵa bıznesti onlaın tirkeý jónindegi QR elektrondyq úkimetiniń qyzmetin paıdalandy, dep habarlaıdy Kólik jáne kommýnıkatsııa mınıstrliginiń baspasóz qyzmetinen. Bul rette aǵymdaǵy jyldyń birinshi aıynda ǵalamtor jelisi arqyly 1500-den astam zańdy tulǵa tirkelgen.
«Kásipkerlerge óziniń bıznesin tirkeý úshin memlekettik organǵa barýdyń qajettiligi joq ekendigin eske salǵan jón. Búgingi kúni elektrondyq túrdegi barlyq rásimder bir kúnnen aspaıdy jáne eshqandaı qosymsha qujattardy talap etpeıdi. Salystyrý úshin - buryn ótinish berýshi adam memlekettik organǵa 5 jáne odan da kóp qujattarmen keletin jáne tirkelý úshin derekterdiń tekserilýin 5 kúnnen 30 kúnge deıin kútetin. Memlekettik qyzmetterdi avtomattandyrý jáne ońtaılandyrýdyń arqasynda tirkelý rásimderin jyldamdatýǵa múmkin týdy», - delingen habarlamada.
Sonymen qatar, elektrondyq úkimettiń AHAT-qa onlaın-ótinishti berý qyzmeti úlken suranysqa ıe. Mysaly, qazirgi tańda 50 000-nan astam jup nekeni tirkeýge ótinimderin egov.kz arqyly berdi, onyń ishinde 3 000-ǵa jýyǵy - 2014 jyldyń qańtarynda ótinim bergen.
Internet arqyly sotqa 27 000-nan asa ótinish berildi jáne jyldyń basynan bastap myńǵa jýyq shaǵym e-ótinishter sotqa jóneltildi.
Azamattar kóbinese óziniń derbes derekteri týraly anyqtamalardy alý jónindegi qyzmetterdi jıi paıdalanady. E-úkimet portaly arqyly jyljymaly múliginiń bar nemese joq ekendigi týraly 40 mıllıonǵa jýyq anyqtamalar, 15 mıllıonǵa jýyq mekenjaı anyqtamalary, 3 mıllıon zeınetaqy aýdarymdary týraly anyqtamalar berildi.
Portalda barlyǵy 233 elektrondyq qyzmet pen servıs qoljetimdi (134 qyzmet jáne 99 servıs), olardyń ishindegi 27 qyzmet 2013 jyly iske qosyldy.
