Qazaqstanda 23 mln.-nan astam adam uıaly baılanys qyzmetterin paıdalanady - QR Statıstıka agenttigi
ASTANA. 13 qańtar. QazAqparat /Jasulan Joldybaev/ - Qazaqstanda uıaly baılanys qyzmetterin paıdalanýshylardyń sany 23 mıllıonnan asady.
Bul týraly búgin ótken brıfıngte QR Statıstıka agenttiginiń tóraǵasy Álıhan Smaıylov aıtty.
QR Statıstıka agenttigi basshysynyń aıtýynsha, 2000 jyly myń adamǵa shaqqanda tek bir adam ǵana uıaly baılanys operatorynyń qyzmetterin paıdalansa, 2011 jyly bul kórsetkish 142-ni qurady.
«2011 jyly abonentterdiń sany 23 mln. 102 myń adam bolǵan. Bul - Qazaqstan halqynyń jartysynan kóbi kem degende eki uıaly baılanys operatorynyń qyzmetin paıdalanady degen sóz», - dep atap ótti ol.
Vedomstvo basshysynyń habarlaýynsha, jalpy 2011 jyly eldegi baılanys salasy 18,7 paıyzǵa ósim kórsetti. Onyń 60 paıyz bóligi ınternet qyzmetiniń, 13,5 paıyzy uıaly baılanys qyzmetiniń ósýi esebinen boldy.
«Sońǵy 11 jylda 1 myń adamǵa shaqqanda ınternet paıdalanýshylardyń sany 2-den 79-ǵa deıin jetti. Ótken jyly ınternet qyzmetin tutynatyn halyqtyń sany 1 mln. 291 myń adamdy qurady. 2000 jyly olardyń sany tek 30 myń bolyp tirkelgen», - dedi ol.
