Qazaqstanda 23 qarashada qandaı joldarda qozǵalys shekteldi
Kompanııanyń málimetinshe, 23 qarasha saǵat 04:30–da Aqmola oblysynda kúnniń buzylýyna (temperatýranyń tómendeýi, kóktaıǵaq) baılanysty respýblıkalyq mańyzy bar KAZ02 «Astana — Kókshetaý (aınalma jol) — Petropavl — RF shekarasy (Jańa Jol ótkizý pýnkti) 19-231 (Astana q. — Şýchınsk q.) ýchaskesinde barlyq kólik túri úshin jyldamdyq 140 shaq/saǵ-tan 80 shaq/saǵ-qa deıin tómendetildi.
Buǵan qosa, úsh oblysta kólik qozǵalysy shektelgen.
Pavlodar oblysy
«Astana — Shiderti — Pavlodar — Ýspenka — RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalysqa ýaqytsha shekteý engizildi.
Qalqaman eldi mekeninen Astanaǵa qozǵalys Bereke «Qalqaman — Aqsý» kólik aıryǵy arqyly (uzaqtyǵy 6 shaqyrym) jáne Pavlodar qalasynan Qalqaman eldi mekenine qozǵalys «Baıanaýyl» kólik aıryǵy arqyly júzege asyrylady.
Soltústik Qazaqstan oblysy
«Tımırıazevo — Sarykól — oblys shekarasy» avtojolynyń 0-30-shaqyrymynda (Qostanaı oblysy shekarasy — Tımırıazevo aýyly) kóliktiń barlyq túri úshin shekteý bar.
Shyǵys Qazaqstan oblysy
Tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.
Eske salaıyq, buǵan deıin «Qazgıdromet» RMK 23 qarasha kúngi aýa raıy boljamyn jarııalaǵan edi.
Sınoptıkterdiń málimetinshe, eldiń soltústiginde burqasyn soǵyp, soltústik pen shyǵysta kóktaıǵaq bolady. Qalǵan aımaqtarda antıtsıklon sileminiń áserinen jaýyn-shashynsyz aýa raıy boljanǵan.