Qazaqstanda 23,1 mln. tonna astyq jınaldy

ASTANA. QazAqparat - QR Úkimetiniń májilisinde QR Aýyl sharýashylyǵy mınıstriniń birinshi orynbasary Qaırat Aıtýǵanov egin jınaý jumystarynyń basym bóligi aıaqtalǵanyn málim etti.

"Respýblıkada dándi daqyldardy jınaý aıaqtaldy. Astyqtyń jalpy jıyny alǵashqy salmaqta 23,1 mln. tonnany qurady. Bul ótken jylmen salystyrǵanda, 1,4 esege joǵary jáne táýelsizdigimizdiń tarıxynda rekordty kórsetkishterdiń biri. Ortasha túsim gektaryna 15,2 tsentnerdi qurady", - dep atap ótti ol.

Onyń aıtýynsha, negizgi astyq óndiretin óńirlerde 16,8 mln. tonna astyq oryldy. Sonymen qatar Qaraǵandy oblysynda 1 mıllıon tonna dándi daqyldar bastyrylǵan, bul oblystyń egin sharýashylyǵy tarıxyndaǵy rekordtyq ónim bolyp tabylady.

"Qazirgi ýaqytta 90 myńǵa tarta gektar jerde egin orylǵan joq. Bizdińshe, bul jumystar bir-eki kúnde aıaqtalady", - dedi vıtse-mınıstr.

Óz kezeginde Úkimet basshysy Baqytjan Saǵyntaev bul astyqtyń bir parasyn ózge elderge eksporttaýdy, dándi daqyldardy qoımaǵa ornalastyrý jáne onyń búlinbeýin qadaǵalaýdy tapsyrdy.