Qazaqstanda 229 myń avtokólik zańdastyryldy

Qazaqstanda 2022 jyldyń 1 qyrkúıegine deıin shetelden jetkizilgen 229 myń avtokólik zańdastyryldy, dep habarlaıdy QazAqparat tilshisi. 

«Memleket basshysynyń tapsyrmasyn oryndaý maqsatynda sheteldik avtokólikterdi birjolǵy zańdastyrý iske asyryldy. Jalpy 229 myń avtokólik zańdastyryldy. Bul rette ótinimdi ýaqytyly bergen jáne belgilengen merzimde avtokólikti zańdastyryp úlgermegen Qazaqstan azamattaryna zańdastyrý quqyǵy bıylǵy 1 shildeden keıin de jalǵasty», - delingen Іshki ister mınıstrliginiń «QazAqparat» agenttigine bergen jaýabynda.

Atap aıtqanda, zańdastyrý barysynda qosymsha kelesi máseleler sheshildi:

1) qosalqy bólshekter túrimen ákelingen avtokólikterdi esepke qoıýǵa ruqsat etildi (ıelikten shyǵarý jáne elden tys jerlerge áketý quqyǵynsyz – osyndaı 18,7 myń kólik tirkelgen).

2) EAEO elderinde esepten shyǵarylmaǵan avtokólikterdi zańdastyrý úshin olardy 5 jylǵa ýaqytsha esepke qoıý arqyly keıinge qaldyrý quqyǵy berildi (mundaı 34,9 myń avtokólik ýaqytsha esepke qoıyldy).

3) úshinshi elderden ákelingen jáne zańdastyrý aıasynda kedendik tazartýdan ótpegen avtokólikter úshin ekologııalyq talaptarǵa sáıkestigin rastaý mindeti alynyp tastaldy.

Eske salsaq, 2022 jyldyń 1 qyrkúıeginen keıin ákelingen kólikter zańdastyrýǵa jatpaıdy.