Qazaqstanda 22 sý qoımasy salynady
TARAZ.QazAqparat - Qazaqstanda sý jetispeýshiligi máselesi jańa sý qoımalarynyń esebinen sheshilmek. Bul týraly Tarazda Jambyl, Almaty, Ońtústik Qazaqstan oblystary ókilderiniń qatysýymen ótken óńiraralyq keńeste aıtyldy, dep habarlaıdy «QazAqparat» HAA.
Elimizdiń 7 oblysynda 22 sý qoımasyn salý josparlanyp otyr. Olar: Almaty, Shyǵys Qazaqstan, Jambyl, Batys Qazaqstan, Qyzylorda, Mańyǵstaý jáne Ońtústik Qazaqstan oblystary. Qurylys jumystary 2021 jyly aıaqtalýy tıis.
Jańa sý qoımalary 1,9 tekshe metr aǵyn sýdy tosyp alýǵa múmkindik beredi. 22 sý qoımasynyń jalpy quny 57,2 mlrd teńgeni quraıdy.
Májilis barysynda osy ýaqytta atalǵan másele boıynsha ınvestıtsııalyq usynys túsip, ol tıisti organdar tarapynan maquldanǵan soń Qarjy mınıstrligine tehnıka-ekonomıkalyq negizdemeleri men jobalaý-smetalyq qujattaryn daıyndaýǵa jiberiletindigi aıtyldy.
Sonymen qatar, 2017-2021 jyldardy qamtıtyn Agroónerkásip keshenin damytý memlekettik baǵdarlamasy boıynsha, gıdrotehnıkalyq qurylǵylardyń tıimdiligin arttyrý men onyń jumysqa qabilettiligin saqtaý boıynsha is-sharalar qarastyrylǵan. 2018 jyldan bastap, 26 apatty jaǵdaıdaǵy sý qoımalaryn qaıta jóndeý jumystary josparlanyp otyr. Óz kezeginde bul shara sý sharýashylyǵy qurylǵylaryn paıdalanýda qaýipsizdikti qamtamasyz etip, 148 ga aımaqtaǵy jerdiń sýarmalylyǵyn arttyrady.
