Qazaqstanda 22 saýda ortalyǵy jabylýy múmkin
ASTANA. QazAqparat - Elimizde órt qaýipsizdigi sharalaryn qabyldamaǵan 22 saýda úıi jabylýy múmkin. Bul týraly búgin halyqpen eseptik kezdesý ótkizgen QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
Onyń aıtýynsha, 2011 jyldan bastap bıznestiń jumysyn jeńildetý jáne oǵan kedergi keltirmeý úshin azamattyq qorǵanys qyzmetteri úıdiń, ǵımarattyń qurylysyn jobalaý jáne qoldanysqa qabyldaýda mindetti túrde kelisimin beretin organdardyń tiziminen shyǵarylǵan. Azamattyq qorǵanys qyzmetteri nysan paıdalanýǵa berilgennen keıin ǵana baqylaý jumystaryn júrgize alady.
«Kemerovodaǵy oqıǵadan keıin biz Bas prokýratýramen kelise otyryp aýdany 1 500 sharshy metrden asatyn adamdar jappaı baratyn nysandar men barlyq oqý oryndaryn tekserdik. Árıne, biz kóptegen buzýshylyqtardy anyqtadyq. Qosalqy shyǵatyn esikterdi jaýyp tastaǵan. Barlyq fakti boıynsha 15 myńnan astam hattama jazyp, 19 mln teńgege aıyppul saldyq. Sotqa 22 nysandy jabý týraly uıǵarym jiberdik. Sebebi olar qoıylatyn talaptarǵa múldem saı kelmeıdi», - dedi mınıstr.
Aıta keteıik, elimizdiń barlyq óńirindegi iri saýda ortalyqtary tekserilgen bolatyn. Nátıjesinde órt qaýipsizdigi erjesin buzǵany úshin ákimshilik is qozǵalǵan saýda úıleriniń tizimin jarııa etilgen edi.
