Qazaqstanda 22 mlrd. tonna óndiris qaldyqtary jınaqtalsa, sonyń 6 mlrd. tonnasy qaýipti qaldyqtar - N. Áshimov
;ASTANA. Qarashanyń 16-sy. QazAqparat /Qanat Mámetqazyuly/ ‑ Búgin QR Parlamenti Májilisinde «Qaldyqtardy keshendi qaıta óńdeý problemalary týraly. Kıoto hattamasynyń tetikterin iske asyrý» atty taqyrypta Úkimet saǵaty ótti. Onda QR Qorshaǵan ortany qorǵaý mınıstri Nurǵalı Áshimov baıandama jasady,
dep habarlaıdy QazAqparat.
Sóz arasynda mınıstr N. Áshimov qazirgi tańda Qazaqstannyń qorshaǵan ortasy úshin ózekti máselelerge toqtala kele, eń aldymen qaldyqtardy keshendi qaıta óńdeý problemasynyń mańyzdylyǵyn atap ótti. «Búgingi kúnge deıin elimizde 22 mlrd. tonnaǵa jýyq óndiris jáne tutyný qaldyqtary jınaqtalǵan. Bunyń 16 mlrd. tonnadan astamy tehnogendik mıneraldyq túzilimder bolsa, 6 mlrd. tonnaǵa jýyǵy qaýipti qaldyqtar bolyp otyr. Bular negizinen óndiris oshaqtarynan shyǵarylǵan ýly hımıkatty qaldyqtar bolǵandyqtan, qorshaǵan ortaǵa da adam densaýlyǵyna da úlken áser etedi», dedi Qorshaǵan ortany qorǵaý mınıstri. Onyń aıtýynsha, Qazaqstandaǵy óndiris qaldyǵy jan basyna shaqqanda bir azamatqa 1 myń 381 tonna úlesten tıedi eken. Al Germanııada bir adamǵa keletin óndiris qaldyqtarynyń úlesi - 400 keli, onyń ústine bul qaldyqtyń barlyǵy, ıaǵnı 100 paıyzy qaıta kádege jaratylady eken.
