Qazaqstanda 22 mln. tonnadan astam astyq bastyrylady - AShM
Bul týraly búgin Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti.
«Tamyzdyń úshinshi onkúndiginde elimizdiń barlyq óńirinde astyq orý naýqany bastaldy. 20 qyrkúıektegi jaǵdaı boıynsha, 11 mln. 100 myń gektar, ıaǵnı astyq daqyldary egisteriniń 72 paıyzdan astamy jınaldy. Atap aıtqanda, 16,5 mln. tonna astyq bastyrylyp, gektarynan ónim shyǵymdylyǵy 14,9 tsentnerdi qurap otyr. Bul óz kezeginde ótken jylǵy deńgeıden 3,4 paıyzǵa joǵary»,-dedi Q. Aıtýǵanov.
Sonymen qatar ol, ońtústik óńirlerde masaqty daqyldardyń oraǵy aıaqtalýǵa jaqyndaǵanyn jetkizdi.
«Batys Qazaqstan oblysynda egin oraǵy aıaqtaldy, al Shyǵys Qazaqstan, Pavlodar, Soltústik Qazaqstan oblystarynda orylýy tıis alqaptardyń 76-dan 88 paıyzǵa deıingi kólemi jınaldy»,-dedi ol.