Qazaqstanda 216,3 mlrd teńgege alkogolsiz sýsyndar shyǵaratyn zaýyt salynady
ASTANA. KAZINFORM - Elimizde QR Úkimeti atynan Aýyl sharýashylyǵy mınıstrligi men «Carlsberg Central Asia» JShS arasynda jasalǵan kelisim sheńberinde alkogolsiz sýsyndar zaýytynyń qurylysy bastalady. Tıisti qaýlyǵa Premer-mınıstr Oljas Bektenov qol qoıdy.
Úkimettiń baspasóz qyzmeti habarlaǵandaı, Almaty oblysynyń Іle aýdanynda halyqaralyq standarttarǵa saı ozyq tehnologııalarmen jabdyqtalǵan zamanaýı óndiristik keshen salynady.
Investıtsııalardyń jalpy kólemi 216 mlrd teńgeden asady, al kásiporynnyń qýaty jylyna 340 mln lıtr alkogolsiz sýsyndar shyǵarýǵa negizdelgen. Jańa zaýyttyń iske qosylýy Qazaqstannyń agroónerkásip kesheni men tamaq ónerkásibiniń damýyna, sondaı-aq eksporttyq áleýettiń artýyna yqpal etedi.
Joba otandyq shıkizat pen materıaldardy paıdalaný esebinen ımportty almastyrýǵa jáne lokalızatsııalaý deńgeıin arttyrýǵa baǵyttalǵan. Joba sheńberinde 230-dan astam jańa jumys orny ashylady, onyń ishinde jumys kúshiniń kem degende 85%-y Qazaqstan azamattary bolady.
Otandyq kadrlardy daıarlaý úshin arnaıy oqytý jáne taǵylymdamadan ótý baǵdarlamalary ázirlengen. Óndiris 2025–2040 jyldar aralyǵynda bıýdjetke 43,5 mlrd teńgeden astam qosymsha kiris ákeledi dep josparlanǵan. Energııa únemdeý tehnologııalaryn engizý, sýdy utymdy paıdalaný jáne basqa da ekologııalyq aspektilerge erekshe nazar aýdarylady.
Qazaqstannyń ınvestıtsııalyq saıasatyna sáıkes, kelisimde ınvestorlarǵa salyqtyq jeńildikter jáne onyń qoldanylý merzimi aıasynda sharttardyń turaqtylyǵyna kepildik qarastyrylǵan.
Joba Qazaqstan Úkimeti janyndaǵy Investıtsııalyq shtab tarapynan súıemeldenedi. Ákimshilik rásimderdi jedeldetý, memlekettik organdarmen ózara is-qımyl uıymdastyrý, jobanyń sátti júzege asyrylýyn qamtamasyz etýde aıtarlyqtaı kómek kórsetildi.
Sondaı-aq Investıtsııalyq shtab alańynda ınvestorlar men Úkimet arasyndaǵy ózara mindettemeler talqylandy.
Іri transulttyq korporatsııalardy tartý – Úkimettiń basym mindetteriniń biri.
Aıta keteıik, elimizde jańa munaı óńdeý zaýytyn salý máselesi qarastyrylyp jatyr.
Tarazda jylyna 2 myń dana aýyl sharýashylyǵy tehnıkasyn shyǵaratyn zaýyt salynady.