Qazaqstanda 21 jasqa tolmaǵandarǵa energetıkalyq sýsyndar satylmaýy múmkin
Premer-Mınıstrdiń jaýabynda bul ónimniń jarnamasyna shekteý engizý, sýsyn ydysynyń kólemin azaıtý, energetıkalyq sýsyndarǵa aktsız engizý jáne 21 jasqa tolmaǵandarǵa ony satýǵa tyıym salý sekildi sharalar eskerilip otyrǵandyǵy jazylǵan.
«Sonymen birge azyq-túlik óniminiń qaýipsizdigi týraly tehnıkalyq reglamentke túzetýler engizý múmkindigi qarastyrylyp jatyr. Bul rette ónim quramynda adam densaýlyǵyna keri áser etetin qospalar jaıynda tutynýshylarǵa shynaıy aqparat berýge qatysty talaptardy kúsheıtý qamtylǵan», - delingen Úkimet basshysynyń jaýabynda.
Premer-Mınıstr Qazaqstanda energetıkalyq sýsyndardy taratýdy shekteý máseleleri Keden odaǵynyń tehnıkalyq reglamentterimen rettelgenin eske salyp ótti.
«Respýblıkada 2017 jyly energetıkalyq sýsyndardyń 487 úlgisi zerttelip, onyń ishinde beseýinde sáıkessizdik ( markırovka boıynsha sáıkes kelmeý - 4, konservant quramynyń shamadan tys artyq bolýy -1) anyqtaldy. Jastar arasynda energetıkalyq sýsyndardyń densaýlyqqa zııandy áserin túsindirý turǵysynda kommýnıkatıvti sharalar uıymdastyryldy. 3 483 dáris oqylyp, ınternet-resýrstarda 450-den astam maqala jarııalandy. Mektepke deıingi, jalpy bilim berý, ınternattyq uıymdardyń jetekshilerimen, sondaı-aq JOO-larda osy taqyrypta 500-ge jýyq semınar-keńester ótti»,- dedi B. Saǵyntaev.
Budan buryn habarlanǵandaı, 2017 jyldyń jeltoqsanynda QR Parlamenti Májilisiniń depýtattary elimizge energetıkalyq sýsyndardyń ákelinýin shekteýdi usynǵan edi.
«Qazirgi ýaqytta elimizdegi medıtsınalyq qoǵamdastyqtar shekteý sharalaryna qaramastan, energetıkalyq sýsyndarǵa jasóspirimderdiń úıir bolýy elimizde tyıylmaı turǵanyn keltiredi. Qazaqstandyq mamandardyń oıynsha, energetıkalyq sýsyndar - psıhotropty zattek bolyp tabylady. Sondyqtan, elimizde energetıkalyq sýsyndardy ákelýdi shekteý baǵytynda taǵy da sharalardy qabyldap, ony tutynǵan jasóspirimder úshin ákimshilik jaýapkershilikti engizýdi nemese ony satylýyn tolyq toqtatýdy usynamyz», - delingen depýtattyq saýalda.