Qazaqstanda 2081 stýdent bos bilim granttarynyń ıegeri atandy - Bilim jáne ǵylym mınıstrligi
ASTANA. Qańtardyń 26-sy. QazAqparat /Gúlnár Jandaǵulova/ - Qazaqstanda 2081 stýdent bos bilim granttarynyń ıegeri atandy, dep habarlaıdy QazAqparat.
«Keshe Granttardy taǵaıyndaý jónindegi respýblıkalyq komıssııanyń otyrysy ótti. Búgin biz bos bilim granttaryn taǵaıyndaımyz, 2081 stýdent granttarǵa ıe bolady», dep málim etti Bilim jáne ǵylym mınıstri Janseıit Túımebaev búgin ótken baspasóz máslıhatynda.
Mınıstrdiń aıtýynsha, ótken jyldan beri 23 737 stýdent grant ıegeri atanǵan, bul jalpy memlekettik tapsyrystyń 70 paıyzyn quraıdy. «Bul bilim alyp jatqan jastarǵa memleket tarapynan qoldaý kórsetýdiń buryn-sońdy bolmaǵan oqıǵasy», deıdi ol.
Bos bilim granttary aqyly bólimderdiń stýdentterine, olardyń úlgerimderi men áleýmettik mártebelerine qarap, konkýrstyq negizde taǵaıyndalyp otyr.
Grantqa ıe bolǵandardyń 763-i - jetim stýdentter, múgedekter, kóp balaly, tolyq emes jáne turmysy tómen otbasylardyń balalary. Sondaı-aq bul tizimge ata-analary zeınetker nemese múgedek jastar da kiredi.
Aıta ketý kerek, 2009 jyly qosymsha jáne bos bilim granttaryna 21 656 stýdent aýystyryldy, bul jyl saıynǵy memlekettik bilim tapsyrysynyń 62 paıyzyn quraıdy.
