Qazaqstanda 2050 jylǵa qaraı jańartylatyn energııa kózderiniń úlesi 50%-ǵa jetedi

ASTANA. KAZINFORM – Bishkek qalasynda Ortalyq Azııa elderiniń áıel-kóshbasshylary, sarapshylary jáne memlekettik organdarynyń ókilderin biriktirgen «Sý resýrstary men energetıka salasyndaǵy áıelder» atty óńirlik dıalog ótti.

Kezdesýdiń basty taqyryby – óńirde klımattyq turaqtylyqty qamtamasyz etýdegi, sý qaýipsizdigi men energetıkalyq kóshýdi ilgeriletýdegi áıelderdiń róli boldy.

Qazaqstan atynan forýmǵa QR Energetıka mınıstrligi jańartylatyn energııa kózderi departamentiniń bas sarapshysy Aınara Aıdynqyzy qatysty. Óz sózinde ol energetıka salasyndaǵy áıelderdiń kásibı qaýymdastyǵyn nyǵaıtýǵa baǵyttalǵan jumystardy atap ótti. Atap aıtqanda, Qazaq Green janyndaǵy Ádiletti energetıkalyq kóshý jónindegi áıelder komıteti men KazEnergy janyndaǵy Áıelder energetıkalyq klýbynyń bastamalary kóshbasshylyqty damytýǵa, tájirıbe almasýǵa jáne kásibı ósimge yqpal etetinin aıtty.

Qazaqstan energetıkalyq kóshý úderisine áıelderdi keńinen tartý; kásibı damý men mansaptyq ósim úshin múmkindik jasaý; óńiraralyq dıalog pen yntymaqtastyqty keńeıtý baǵyttaryna basymdyq beredi.

Qazaqstan 2030 jylǵa qaraı JEK úlesin 15%-ǵa, al 2050 jylǵa qaraı 50%-ǵa deıin jetkizýdi maqsat etip otyr.

Qazirgi tańda JEK sektorynda shamamen 2000 maman jumys isteıdi, onyń ishinde áıelderdiń úlesi turaqty túrde ósýde. Bul úrdisti jalǵastyrý úshin áıelderdiń strategııalyq josparlaýǵa, jobalardy basqarýǵa jáne sheshim qabyldaýǵa belsendi qatysýyna jaǵdaı jasaý mańyzdy.

Aıta keteıik, 2029 jylǵa deıin jańartylatyn energııa kózi iri obektisi aıaqtalady.