Qazaqstanda 2040 jylǵa qaraı sý tapshylyǵy artýy múmkin
ASTANA. 7 qazan. QazAqparat - Eger sý resýrstaryn paıdalanýdyń jáne basqarýdyń tıimdiligi kóterilmeıtin bolsa, onda 2040 jyldarǵa qaraı sý tapshylyǵy arta túsedi.
Búgin Parlament Májilisindegi Úkimet saǵatynda Qorshaǵan ortany qorǵaý mınıstri Nurlan Qapparov osylaı málim etti.
Mınıstrdiń aıtýynsha, 2050 jylǵa deıingi strategııa boıynsha 2020 jylǵa qaraı halyqty, al 2030 jylǵa qaraı aýyl sharýashylyǵyn sýmen turaqty qamtamasyz etý maqsattary mejelengen. ıAǵnı, 2050 jylǵa qaraı sý resýrstaryna baılanysty elimizde túıtkildi másele bolmaýy tıis. Osyǵan oraı, Qorshaǵan ortany qorǵaý mınıstrligi sý resýrstaryn basqarý jónindegi memlekettik baǵdarlamany ázirleýde.
«Jalpy, kútilip otyrǵan sýdy tutynýdyń arta túsý úrdisi jáne sý resýrstarymen qamtamasyz etýdiń tómendeýi tapshylyqtyń ósý qaýpi bar degen tujyrym jasaýǵa múmkindik beredi. Al mundaı problemaǵa Qazaqstandaǵy segis sý basseıiniń altaýy 2020 jylǵa qaraı ushyraýy múmkin. Eger sý resýrstaryn paıdalanýdyń jáne basqarýdyń tıimdiligi artpaıtyn bolsa, onda 2040 jylǵa qaraı sý tapshylyǵy joǵarylaıdy. Bul óz kezeginde halyqty sýmen qamtamasyz etýge, ekologııalyq jaǵdaıǵa keri áserin tıgizýi múmkin», deıdi N. Qapparov.
Onyń sózine qaraǵanda, barlyq tutynýshylar boıynsha sýdy úlesti tutynýdy tómendetý jáne tıimdi paıdalaný boıynsha josparlanǵan sharalar júzege assa, onda jylyna 15 mıllıard teńgeni quraıtyn sýdy únemdeýge qol jetpek.
