Qazaqstanda 2035 jylǵa deıin jańa munaı-gaz ken oryndaryn ıgerý jospary ázirlendi
ASTANA. KAZINFORM – Qazaqstanda kómirsýtekterdiń resýrstyq bazasyn ulǵaıtý úshin 2035 jylǵa deıin jańa munaı-gaz ken oryndaryn ıgerý jospary qabyldandy. Bul týraly Ortalyq kommýnıkatsııalar qyzmetinde ótken baspasóz májilisinde QR Energetıka vıtse-mınıstri Qaıyrhan Tutqyshbaev málimdedi.
– Taýarlyq gazǵa ishki suranystyń artýyna jáne jańa ınvestıtsııalyq jobalardy qajetti gaz kólemimen qamtamasyz etý maqsatynda Energetıka mınıstrligi «Samuryq-Qazyna» AQ, «QazaqGaz» UK AQ jáne «QazMunaıGaz» UK AQ-men birlesip tıisti josparǵa qol qoıdy. Jospar Qazaqstan Respýblıkasynyń jańa munaı jáne gaz ken oryndaryn ıgerýdiń júıeli ári kezeń-kezeńimen júzege asyrylatyn tetigin qarastyrady. Bul kómirsýtekterdiń resýrstyq bazasyn turaqty túrde ulǵaıtýǵa múmkindik beredi, - dedi spıker.
Vıtse-mınıstrdiń málimetinshe, jańa ken oryndaryn ıgerý úshin geologııalyq barlaý jumystaryn jandandyrý kózdelgen.
Sonymen qatar Jer qoınaýy qoryn basqarý baǵdarlamasy aıasynda keıinnen jer qoınaýyn paıdalaný quqyǵyn berý úshin 30 jer qoınaýy ýchaskesi qarastyrylǵan.
– Qazirgi tańda «QazaqGaz» UK» AQ jáne onyń enshiles uıymdarymen kómirsýtekter salasynda jer qoınaýyn paıdalanýǵa 9 kelisimshart jasaldy. Onyń ishinde 3 kelisimshart óndirý satysynda, 6 kelisimshart barlaý kezeńinde, – dedi vıtse-mınıstr.
Aıta keteıik, Qazaqstanda gaz taratý uıymdaryna jańa talap engizilýi múmkin
