Qazaqstanda 2030 jylǵa deıin elektr kólikterine arnalǵan 250 jańa qýattaý stantsııasy salynady
ASTANA. KAZINFORM — Qazaqstanda 2030 jylǵa deıin elektr kólikterine arnalǵan 250 jańa qýattaý stantsııasy salynady. Bul týraly Úkimet otyrysynda Premer-mınıstr Oljas Bektenov aıtty.
Halyqaralyq energetıka agenttiginiń boljamyna sáıkes, 2030 jylǵa qaraı elektromobılderdiń álemdik avtokólik naryǵyndaǵy úlesi 40 paıyzdan asady. Jahandyq avtoónerkásip salasy da belsendi túrde elektr júk kólikterin paıdalanýǵa kóship jatyr.
Qazirgi ýaqytta elimizdiń negizgi respýblıkalyq joldarynyń boıynda 70-ke jýyq elektr qýattaý stantsııasy jumys isteıdi. Al jaqynda Car Park Transformer kompanııasymen 2030 jylǵa deıin jol boıyndaǵy servıstik aımaqtarda taǵy 250 stantsııa salý jónindegi ınvestıtsııalyq kelisim jasaldy.
— Aldaǵy ýaqytta da jańa ınvestorlar úshin qolaıly jaǵdaı jasap, tıisti ınfraqurylymdy belsendi damytý qajet. Kólik mınıstrligine Ónerkásip mınıstrligimen birlesip, elektr qýattaý stantsııalarynyń jelisin damytý úshin iri halyqaralyq kompanııalardy tartý jumystaryn kúsheıtýdi tapsyramyn, — dedi Oljas Bektenov Úkimettiń búgingi otyrysynda.
Premerdiń aıtýynsha, elimizde elektromobılderge arnalǵan akkýmýlıatorlar óndirisiniń jahandyq tizbegine yqpaldasý úshin qajetti shıkizat qory bar.
— Akkýmýlıator óndirisinde asa mańyzdy — sferaly grafıt shyǵaratyn iri jobany iske qosý josparlanyp otyr. Ónerkásip mınıstrligi múddeli memlekettik organdarmen birlesip, jobanyń ýaqtyly paıdalanýǵa berilýin qamtamasyz etýge tıis, — dedi Úkimet basshysy.
Sondaı-aq jýyrda Memleket basshysy Qytaı Halyq Respýblıkasyna jasaǵan sapary barysynda akkýmýlıator óndirisinde álemdik kóshbasshy sanalatyn CATL kompanııasynyń basshylyǵymen kezdesti.
— Kompanııa elimizdiń aýmaǵynda joǵary tehnologııalyq óndiristi iske asyrý nıetin rastady. Barlyq ýákiletti organ atalǵan jobany júzege asyrý barysyn erekshe baqylaýda ustaýy qajet, — dedi Oljas Bektenov.
Buǵan deıin Oljas Bektenov 10 kún ishinde elge avtokólikterdi zańsyz ákelýdiń jolyn kesýge baǵyttalǵan keshendi sharalar ázirleýdi tapsyrdy. Jańa talaptar 2026 jylǵy 1 qyrkúıekten bastap qoldanysqa engiziledi.
Aıta keteıik, bıyl elimizde 190 myń avtokólik shyǵarylady.
Qazaqstannyń 19 oqý ornynda avtoónerkásip mamandary daıarlanyp jatyr.
